Балаҕын ыйын 1 күнэ – Билии күнэ. Сайыны устата оҕолор сынньанан, дьонноругар көмө буолан, сынньанан үөрэ-көтө үөрэх дьыла саҕаланар линейкатыгар кэллилэр. Сайын устата чуҥкуйбут оскуолабыт аана арыллан, оҕо аймах үөрүүтүнэн туолла.
Биһиги оскуолабытыгар сырдыы-үөрэ чаҕылыйа, кэрэ сибэкки тутуурдаах, саҥа суумка сүгэһэрдээх, төрөппүттэрин кытта сиэттиһэн оскуолаҕа аан бастаан үктэнэр кырачааннарбыт кэллилэр. Быйыл маҥнайгы кылааска уопсайа 6 оҕо киирдэ. Кинилэри бастакы учууталлара, үрдүкү категориялаах учуутал, “Надежда Якутии” бэлиэ хаһаайката Айталина Александровна Федорова үөрэ көрүстэ. Выпусниктар үтүө үгэстэринэн, «Самолетик будущего» акцияҕа кыттыһан, бастакы кылаас үөрэнээччилэригэр анаан, баҕа санаалардаах сөмөлүөттэри бэлэхтээтилэр. Сэмэн Дмитриевич Флегонтов аатынан Хадаар орто оскуолатыгар үөрэнэ киирбиттэрин туоһулуур бирикээһи оскуолабыт убаастабыллаах дириэктэрэ Петр Петрович Тарасов ааҕан иһитиннэрдэ.
Саҥа үөрэх дьылынан Хадаар нэһилиэгин баһылыгын солбуйааччыта Перизат Бакболотовна Дьячковская, Чурапчы улууһунааҕы нэһилиэнньэ социальнай көмүскэлин уонна үлэ управлениетын салайааччыта Лидия Васильевна Тосукаева, улуустааҕы үөрэх салаатын сүрүн үлэһитэ Николай Петрович Артемьев, оскуолабыт төрөппүттэрин түмсүүтүн бэрэссэдээтэлэ Яна Иннокентьевна Тарасова эҕэрдэлээтилэр.
Үөрүүлээх тэрээһиҥҥэ билиигэ, сырдыкка сирдии кэлбит оскуолабыт саҥа учууталларын кытта билиһиннэрдилэр. Ол курдук быйылгы үөрэх дьылыгар математика учуутала Лена Гимовна Яковлева, нуучча тылын уонна литературатын учуутала Анна Николаевна Евстафьева үлэлии кэллилэр. Маны таһынан оскуолабыт завхоһунан Виталий Васильевич Винокуров анаммыт. Саҥа учууталларга ситиһиилээх, таһаарыылаах үлэни баҕаран туран өйдөбүнньүк бэлэхтэри туттардылар. 2025-2026 үөрэх дьылын бастакы чуораанын тыаһатар чиэс маҥнайгы кылаас үөрэнээччитигэр Кэрэл Мордоскинаҕа уонна 11 кылаас үөрэнээччитигэр, оскуолабыт лидеригэр Саша Ксенофонтовка бэрилиннэ.
Балаҕан ыйын 5 күнүгэр Яна Васильевна Климова салайааччылаах Кытайга аан дойдутааҕы фестивальга кытта барар оҕолор ырыаларын ыалдьыттарга, учууталларыгар, бииргэ үөрэнэр доҕотторугар бэлэх ууннулар.
Быйылгы үөрэх дьыла ситиһиилээх, таһаарыылаах буоллун!
Алена КСЕНОФОНТОВА, IX кылаас,
С.Д. Флегонтов аатынан Хадаар орто оскуолата, Чурапчы