Бүгүн, балаҕан ыйын 22 күнүгэр, саҥа үөрэх нэдиэлэтин саҕалыыр линейка Дүллүкү орто оскуолатыгар ыытылынна. Былааҕы улуустааҕы күһүҥҥү эстафетаҕа бастаабыт оҕолор Диана Васильева, Дамир Стручков ( 4 кыл.), Эрхаан Мандаров (8 кыл.), Александра Иванова, Арылхан Руфов (9 кыл.), Алина Санникова (11 кыл.) күөрэччи тутан киирдилэр.
«Радуга» оҕо тэрилтэтин салайааччы Наталья Матвеевна Степанова үөрэнээччилэр ааспыт нэдиэлэтээҕи үлэҕэ, үөрэххэ, спорка ситиһиилэрин кэпсээтэ. Онтон бу нэдиэлэттэн саҕалаан кылаастарынан үөрэххэ уонна бэрээдэккэ куоталаһыы саҕаланарын иһитиннэрдэ. Кылаастарынан куоталаһыы тэтэрээтэ оҥоһуллубут. Онно оскуола форматын кэтии, үөрэх, кылаас бэрээдэгэ, дьуһуурустуба бэрэбиэркэлэнэн суруллар. Уруок аайы учууталлар киирэн баал туруораллар. Түмүк үөрэх дьылын бүтүүтэ тахсар.
Салгыы бу нэдиэлэтээҕи былааны, Саха Республикатын Судаарыстыбаннаһын күнүн көрсө туох тэрээһин ыытылларын, дириэктэри иитэр үлэҕэ солбуйаачы Екатерина Степановна Федорова билиһиннэрдэ.
Линейка Өрөгөй ырыатынан түмүктэннэ. Оҕолор «Дьоһуннааҕы кэпсэтии» кылаас чааһыгар тарҕастылар.
Айыына Петрова, 9 кылаас, Сааскыйа Васильева, 10 кылаас, «Эрчим» медиакиин, Дүллүкү, Үөһээ Бүлүү