Биһиги тапталлаах Уолбабыт, кыралаан да буоллар, сыллата тупсан иһэр. Быйыл сэтинньи ыйга нэһилиэкпитигэр олохтоохтор көҕүлээһиннэрин өйүүр программанан (ППМИ) Хамньыкы үрэҕи туоруур муоста үөрүүлээх арыллыыта буолла.
Нэһилиэк баһылыга Василий Петрович Рахлеев саҥа муоста үйэлээх буоларыгар баҕа санаатын эттэ, муоста тутуутугар саҕаланыаҕыттан үлэлэспит, нэһилиэкпит баһылыгынан ааспыт сылларга үлэлээбит Винокуров Александр Афанасьевич Винокуровка, докумуон хомуйсуутугар, оҥоруутугар үлэлэспит Иван Николаевич Беляевка, дьаһалта бары үлэһиттэригэр уонна нэһилиэк олохтоохторугар улахан махталын биллэрдэ.
Тутууну ыыппыт биригээдэ салайааччыта Виктор Иннокентьевич Другин тутууга көмөлөспүт нэһилиэкпит олохтоохторугар, чуолаан Иннокентий Трофимович Боппосовка, Илья Ильич Кусатовка махтанна.
Саҥа муостабыт балаҕан ыйыттан тутуллан саҕалаабыта. Үрэх уҥуор олорор дьон саҥа муостанан үөрэ-көтө туһанар буоллулар. Саҥа муостабыт дьоҥҥо өр кэмҥэ туһалыы турдун.
Алёна ТАППЫРОВА, VIII кылаас,
В.И. Ленин аатынан Уолба орто оскуолата, Таатта