П.А. Ойуунускай аатынан государственнай бириэмийэ лауреата С.С. Васильев-Борогонскай төрөөбүт күнэ — балаҕан ыйын 25-һэ. Суоттуга киниэхэ аналлаах тэрээһин ыыттылар. Ыччакка биир дойдулаахтарын айымньыларынан саха поэзиятын аанын сэгэттилэр.
Бу бэлиэ күҥҥэ анаан Суотту олохтоох бибилэтиэкэтигэр оскуола үөрэнээччилэригэр анаан «Биһиги Сэргэйбит» диэн литература күнэ ыытылынна. Бибилэтиэкэ үлэһитэ Р.Н.Черкашина, национальнай культура учуутала А.И.Копырина оҕолорго биллиилээх биир дойдулаахпыт олоҕун, үлэтин биллэрэр, айымньыларынан умсугутар сыаллаах тэрээһини сэргэхтик ыыттылар.
Тэрээһиҥҥэ профессинальнай үөрэхтээһин бэтэрээнэ, Суотту нэһилиэгин Бочуоттаах олохтооҕо С.Д.Федоров Сергей Васильев төрдүн-ууһун туһунан умсугутуулаахтык кэпсээтэ, Серафим Данилович поэт Н.Н. Окоемовка анаабыт хоһоонун өйтөн аахта.
Сэттис кылаас үөрэнээччитэ, С.Васильев хос сиэнэ Айысхаана Васильева Сахаяна Ермолаева хоһоону долгутуулаахтык толордо.
Оҕолор поэт олоҕун, айар үлэтин кытта ыкса билистилэр, «Улуу Ленам» хоһоонун өйтөн аахтылар, бириистээх биктэриинэҕэ көхтөөхтүк оонньоотулар. Түмүккэ бары «Дьон норуот сааскыта» ырыаны толордубут.
Ааптар: Эдэр кэрэспэдьиэннэр бөлөхтөрө.