“Хохуоралаах тыллаах
Хоҥкунас тыастаах,
Холобура суох хоһоонноох
Хомус барахсаны
Хомуһуннаан айбыта үһү”, диэн Өксөкүлээх Өлөксөй бэргэнник да хоһуйбут “Хомус” хоһоонугар. Бүгүн, бэс ыйын 16 күнүгэр Дьокуускай куоракка Норуоттар икки ардыларынааҕы “Хомусист—виртуоз мира” III куонкурус саҕаланна. Россия араас регионнарыттан, Монголияттан, Японияттан аатырбыт хомусчуттар ыалдьыттыыллар.
Сарсыарда П.А.Ойуунускай аатынан Саха академическай тыйаатырын иннигэр 300 киһи мустан, хомуска ооонньоон дьүрүһүттэ!
Хомуска оһуокай матыыбын Иван Алексеев-Хомус Уйбаан, Спиридон Шишигин, Альбина Дегтярева, Ким Борисов таһаардылар. Ансаамбыл кыттыылаахтара, хомуһу таптааччылар, ыччаттар, оҕолор хото мустан, Ыһыах тыынын биллилэр, куйаарга кэрэкэ дорҕооннору көтүттүлэр.
Бэйэлэрин санааларын флэшмоб кыттыылаахтара Дьокуускай куорат 16 №-дээх орто оскуолатын үөрэнээччилэрэ Лиза, София, Мария Шишигиналар, Мииринэйдээҕи политехническай лиссиэй үөрэнээччитэ Аня Башарина үллэстэллэр:
— Бэс ыйын 16 күнэ биһиэхэ умнуллубат бэлиэ түгэн буолла. Бүгүн биһиги Саха өрөспүүбүлүкэтэ 100 сылыгар анаммыт улахан флешмобка эбэбит Анна Афанасьевна Шишигина тэрийэн, көҕүлээн, итиэннэ эдьиийбит Туйаара Анатольевна Жиркова хомустуурга үөрэтэн, кытынныбыт. Хомуска оонньуурга биһиги zoom платформа нөҥүө үөрэммиппит. Тэйиччиттэн үөрэнии эмиэ туспа үчүгэйдээх эбит. Тоҕо диэтэххэ, хомуһу тардарга Дьокуускайга баар эрэ аймахтар буолбакка, Мииринэйгэ, Мохсоҕоллооххо, бэл диэтэр, Германияҕа олорор аймахтарбыт кытары үөрэннилэр. Бүгүн олус сырдык, сылаас, сайыҥҥылыы күн үүнэн, сүргэбит көтөҕүллэн, астынан оонньоотубут. Биһиги бу тэрээһиҥҥэ олус үөрэн кытынныбыт. Хомус диэн — дьону, омуктары чугаһатар, ситимниир дьикти, кэрэ үнүстүрүмүөн. Хомус тыаһынан ис туруккун, иэйиигин биллэриэххин сөп. Ыраах айаҥҥа илдьэ барарга да үгүс миэстэни эҥин ылбат. Хомуһу биһиги аймахпыт Николай Спиридонович Шишигин идеятынан космоска оннооҕор көтүтэ сылдьыбыттара. Хомус тыаһа кими баҕарар долгутар, үөрдэр, сүрэх уйан кылларын таарыйар. Виртуоз хомусчуттар эгэлгэ дорҕооннору дьүрүһүтэ оонньоон бардахтарына, киһи эрэ умсугуйуох, бэйэҥ оннук дьикти, эриэккэс дьүрүскэни сатыаххын баҕарар санааҥ күүһүрэр.
ххх
Бүгүн, сарсын “Хомуска Аан дойду виртуоз оонньооччута” ааты ылар иһин күөн күрэс ыытыллар. Манна барыта 40-ча киһи кыттар.
Жанна ЛЕОНТЬЕВА.