Бэс ыйын 27-28 күннэригэр Ытык Таатта сиригэр, Дьохсоҕон нэһилиэгэр, өрөспүүбүлүкэ таһымнаах «Иис үлэ ыһыаҕа-2023» буолла. Тэрээһин сыала — байыаннай дьайыыга сылдьар ыччаттарга таҥас тигии. Манна 11 хамаанда мустан икки күнү быһа кыһамньылаахтык үлэлээтилэр, ол курдук, Мэҥэ-Хаҥаластан, Уус Алдантан, Үөһээ Бүлүүттэн, Тааттаттан кэлэн кытыннылар.
Ыһыаҕы тэрийэн ыыттылар Дьохсоҕон нэһилиэгин дьаһалтата, Алампа аатынан норуот айымньытын киинэ, Өксөкүлээх Өлөксөй аатынан Дьохсоҕон орто оскуолата уонна «Илии сылааһа» общественной түмсүү. Дьохсоҕон нэһилиэгин баһылыга Петр Егорович Захаров, буойуттар дойдуларыгар кинилэри итэҕэйэллэрин-өйүүллэрин билиэхтээхтэр, соҕотох буолбатахтарын туоһулуур туһугар бу тэрээһини тэрилиннэ диэн санаатын үллэһиннэ.
Ыһыах устата уопсайа 30 кэмпилиэк таҥас тигилиннэ. Күрэх түмүгүнэн, Майа — 1 миэстэ, Ытык Күөл — 2 миэстэ, Кыйы — 3 миэстэ буоллулар. Ону таһынан «Эр хоһуун» анал кэмпилиэккэ таҥастарын сиэбигэр угуллар алгыстаах харысхалы Дьохсоҕон нэһилиэгин ыччаттара оҥордулар.
Биэс харахтаах харысхал хара дьайтан, куһаҕан тыынтан, сэттэн-сэлээнтэн, киһини быһа этэр тылтан харыстыыр аналлаах эбит. Харысхал оҥоһуутун маастар-кылааһын ХИФУ саха тылын уонна норуоттар култуураларын үнүстүтүүтүн иккис кууруһун устудьуона Анна Дорофеева тэрийэн ыытта.
Оҕолор көмүскэс убайдарыгар ис санааларыттан тахсар баҕа санаа кэрэкэ тылларын суруйдулар. Кыттааччылар этэллэринэн, сүрүн сыаллара, миэстэлэһии буолбакка, уолаттарга туһалаах буолаары уонна кинилэргэ таҥас тигэн күүс-көмө буолуу.
Джулианна Дорофеева, Н.И. Протопопова аатынан «Кэскил» оҕо айар тобулар киинэ,
«Репортер» медиакиин эдкора, Бүлүү к.