С.П. Данилов аатынан Бэрдьигэстээх орто оскуолата 90-с сыллартан педагогическай кылаастары тэрийиигэ ситимнээх үлэни ыытар. Алтынньы 20 күнүгэр оскуолабытыгар М.К. Аммосов аатын ХИФУ педагогическай институтун иһинэн үлэлиир дьоҕус психолого-педагогическай академияны кытта бииргэ үлэлэһиигэ сөбүлэһии баттанна.
Оскуола 8-а кылааһын үөрэнээччилэрин педагогическай үөрэх уонна психолого-педагогическай идэлэргэ бэлэмниир кылаас аһылынна. Сөбүлээһиини баттастылар оскуола директора Маргарита Константинова уонна дьоҕус академия координатора, социальнай педагогикаҕа старшай преподаватэлэ Туяра Евдокарова. Педагогическай наука кандидата, социальнай педагогика кафедратын доцена Степанида Дмитриева оҕолору эрдэттэн учуутал буолалларыгар хайысхаларын ыйан бэлэмниргэ санаатын эттэ.
Үрдүкү кылаас оҕолоругар идэҕэ туһаайыыга бэсиэдэлэри ыыттылар. Оҕолор пединститут устудьуоннарын Феодосий Ефремов, Владилена Львова иһитиннэриилэрин сэргээн иһиттилэр. Салгыы оҕолорго педагогическай квест оонньууну ыыттылар уонна 8-а кылаас үөрэнээччилэрин, төрөппүттэрин кытта көрүстүлэр.
«Кэскил» медиа-оскуола.