Быйылгы үөрэх дьылыгар С.П. Данилов аатынан Бэрдьигэстээх орто оскуолатыгар икки математика, физкультура учууталлара, педагог-психолог, социальнай педагог, логопед, оҕо хамсааһынын тэрийээччи педагог уонна гигиенист ананан үлэлии кэллилэр.
Кинилэртэн кылгас маннык ыйытыктардаах интервью ыллыбыт:
- Бэйэҕин кыратык сырдат (хантан төрүттээххин, дьиэ кэргэниҥ туһунан, ханна үөрэммиккиний, ханна үлэлээбиккиний)
- Үлэҥ таһынан туох дьарыктааххыный?
- Эн санааҕар, оҕолору кытта үлэлиир ыарахан дуо?
- Инники былааныҥ, баҕа санааҥ.
Алена Анатольевна Мухоплева, логопед:
Мин кэргэннээхпин, үс оҕолоохпут. Икки уол 3,4 кылааска үөрэнэллэр уонна кыыспыт оскуола боруогун быйыл атыллаата. Горнай улууһун Аһыматыттан төрүттээхпит эрээри, Бэрдьигэстэххэ дьиэ-уот туттан олохсуйбуппут 15 сыл буолла. Мин инники «Россельхозбаҥҥа» уонна «АТБ» бааҥҥа үлэлээбитим. Үлэм таһынан «Фотокнига» оҥорор дьарыктаахпын уонна ас астыырбын туохтааҕар да ордоробун. Баан эйгэтигэр үлэлии сылдьыбыт буолан, оҕолору кытта үлэлиир ыараханын-чэпчэкитин билигин этэр кыаҕым суох, ол эрэн бириэмэ көрдөрүөҕэ дии саныыбын. Оҕолору таптыыр буолаххына, оҕолору кытта үлэлиир ыарахана суох дии саныыбын. Инникитин мин саҥа талбыт идэбинэн сайдан иһиэхпин, элбэх билиилээх-көрүүлээх үлэһит буолар баҕа санаалаахпын. Оҕолорго көмөлөһүөм, үөрэтиэм диэн былааннаахпын.
Лолита Александровна Петрова, социальнай педагог:
Бэйэм Сунтаартан төрүттээхпин. Быйыл М.К. Аммосов аатынан ХИФУ психология салаатын бүтэрэн, оскуолаҕа социальнай педагогунан үлэлии кэллим. Быйыл идэбинэн бастакы сылбын үлэлиибин. Үлэм таhынан кинигэ ааҕарбын, киинэ көрөрбүн, вышивкалыырбын сөбүлүүбүн. Оҕолору кытта үлэлиир бэйэтэ уустуктаардаах. Киhи барыта бэйэ бэйэтиттэн ураты, атын көстүүлээх, санаалаах буолар. Онон оҕону кытта, бастатан туран, уопсай тыл булуохха наада дии саныыбын, оччоҕо үлэ даҕаны чэпчэкитик ааhыаҕа. Инникибин наһаа былааннаммаппын, ол гынан баран бу маҥнайгы үлэлиир сылым этэҥҥэ ааhарыгар баҕарабын.
Алена Васильевна Александрова, гигиенист:
Чурапчы улууһуттан төрүттээхпин. Бэрдьигэстээххэ кийиит буолабын. Кэргэннээхпин, икки кыыс оҕолоохпун: улаханым – 5-с кылаас үөрэнээччитэ, кырам – 5 саастаах уһуйаан иитиллээччитэ. М.К.Аммосов аатынан ХИФУ пед.институт начаалынай кылаас учууталын идэтин баһылаабытым, 2020 сыллааха үөрэхпин бүтэрбитим. Үлэм таһынан волейболлуурбун, спордунан дьарыктанарбын сөбүлүүбүн, торт астыыбын. Оҕолору кытта үлэлиир биир сүрүн улахан үлэ дии саныыбын, сүрүнэ, оҕолору истэ, кэпсэтэ, биир тылы була үөрэниэххэ наада.
Анисия Петровна Софронова, математика учуутала:
Мин Хаҥалас улууһун Тиит Арыы нэһилиэгиттэн төрүттээхпин. Оскуолабын төрөөбүт нэһилиэкпэр бүтэрбитим, ол эрэн 8-10-с кылаастарга Покровскай 1 №-дээх оскуолатыгар физика, математика кылааһыгар үөрэммитим. Оскуолабын бүтэрэн, М.К.Аммосов аатынан ХИФУ математика уонна информатика институтугар математика учууталын хайысхатыгар киирбитим. 2024 с. үөрэхпин бүтэрэн, Горнай улууһун Күөрэлээх нэһилиэгэр биир сыл үлэлээбитим. Билигин Бэрдьигэстээх орто оскуолатыгар үлэлии сылдьабын. Билиҥҥи уйэ учуутала, мин санаабар, оҕолору сөбүлүүр, оҕолору кытта тэҥҥэ сайдан иһэр, билиҥҥи үйэ технологиятын баһыйбыт, оҕолорго билиини эрэ биэрэр буолбакка, кинилэр бэйэлэрэ туспа личность буола улааталларыгар кыһаллыахтаах. Учууталлыырым таһынан тыҥырах оҥоробун, спортзал арыллара буоллар, киэһэлик волейболлуом этэ. Мин санаабар, оҕолору кытта үлэлиир ыарахана, чэпчэкитэ хас биирдии учууталга араас буолар, кимиэхэ эрэ оҕолору кытта кэпсэтэр, уопсай тыл булар олус судургу, оттон миэхэ уустуктардаах. Баҕа санаам диэн бу үөрэх дьылыгар үөрэнээччилэрим ВПР-дарын, экзаменнарын үчүгэйдик туттаралларыгар, бүтэрэр кылаастар баҕарбыт үөрэхтэригэр киирэллэригэр, биир да уруогу көтүппэккэ, үчүгэйдик үөрэнэллэригэр ба5арабын.
Саҥа үлэһиттэрбитигэр ситиһиилэри баҕарабыт! Баҕа санааларгыт туолуохтара диэн эрэнэбит!
Салгыы интервьюну видео-матырыйаалбытыгар көрүҥ:
Интервьюну ылла Кирилл Иванов, Сэмэн Данилов аатынан Бэрдьигэстээх орто оскуолатын «Сайдам» медиакиин эдэр кэрэспэдьиэнэ