Степан Кузьмич Макаров аатынан Чурапчы гимназиятын быйылгы кыһыл көмүс мэтээлгэ үлэлэһэр выпускницата Сардаана Седалищева нуучча литэрэтиирэтин предметигэр, улуус устуоруйатыгар бастакынан 100 баалы ылан учууталын, гимназия кэлэктиибин уонна төрөппүттэрин Саргылаана Андреевнаны уонна Данил Константиновиһы улаханнык үөртэ.
“Сардаана 5 кылаастан саҕалаан гимназияҕа туйгуннук үөрэнэр. Үөрэҕэр олус кыһамньылаах, кинигэ ааҕарын туохтааҕар даҕаны ордорор. Үөрэнэрин тухары мэлдьи научнай-практическай конференцияларга ситиһиилэхтик кыттан кэллэ. “Инникигэ хардыы” конференцияҕа өрөспүүбүлүкэҕэ кыттан баран Бүтүн Арассыыйатааҕы түһүмэххэ тиийэн дипломант буолбута. Кини бэйэтэ гуманитарнай эрэ хайысхаҕа буолбакка туочунай наукаҕа эмиэ олус кыахтаах. Иллэҥ кэмигэр элбэҕи ааҕар, бэйэтэ туспа түмүктэри оҥорор аналитик оҕо диэн сыаналыыбын. Итини таһынан кини наһаа үчүгэй уруһуйдьут, ордук графическай дизайн өттүн тутуһар. Биһиги Сардаананы кытары 8 кылаастан ыла литэрэтиирэ уруогар күүскэ бэлэмнэммиппит, 9 кылааска ОГЭ-ны эмиэ үчүгэйдик туттарбыта. Онон күндү үөрэнээччибин ситиһиитинэн өссө төгүл эҕэрдэлииибин, баҕарбыт идэтигэр туттарсан киирэригэр баҕарабын”, – диэн гимназия нуучча тылын уонна литэрэтиирэтин учуутала, “”Саха сирин эрэлэ” бэлиэ хаһаайына Лена Романовна Семенова санаатын үллэстэр.
“Кырдьыгынан эттэххэ, литэрэтиирэ өйтөн суруйуутун наһаа чаҕылхайдык суруйдум дии санаабатаҕым (үөрэр). Ийэм бу сарсыарда 100 баалы ылбыккын диэн эппитигэр бу билиҥҥээҥҥэ диэри итэҕэйбэккэ олоробун. Биллэн туран учууталбар Лена Романовнаҕа уонна ийэбэр Саргылаана Андреевнаҕа улаханнык махтанабын, кинилэр миигин мэлдьи өйөөннөр үөрэхпэр ситиһиилэнним дии саныыбын. Биир кэлим эксээмэннэри, художественнай үөрэххэ туттарсарым быһыытынан нуучча тылыгар уонна литэрэтиирэтигэр туттардым, нуучча тылын түмүгэ бу 20-с чыыһылаҕа биллиэхтээх. Бииргэ үөрэнэр доҕотторбор эмиэ ситиһиилэри баҕарабын”, – диэн Сардаана кэпсиир.
Сэмэн Жендринскэй.
Төрүт матырыйаал: МО «Чурапчинский улус (район)»