Мин аатым Виолетта Юмшанова. Боруулаах орто оскуолатын алтыс кылааһыгар үөрэнэбин. Биһиги дьиэ кэргэммитигэр алтыабыт: ийэм, аҕам, икки убайдаахпын уонна эдьиийдээхпин. Ийэм олохтоох дьаһалтаҕа бухгалтерынан үлэлиир. Аҕам — урбаанньыт. Убайдарым Владивосток куоракка үрдүк үөрэх кыһатыгар устудьуоннуу сылдьаллар. Эдьиийим миигин кытары биир оскуолаҕа үөрэнэр.
Үөрэх дьыла бүтээтин кытта, самаан сайыммыт кэлиитэ, от-мас көҕөрүүтэ сайылыкка көһөбүт. Сайылыкпытыгар эдьиийбин кытары торбосторбутун күҥҥэ иккитэ аһатабыт. Киэһэ сөрүүн түһүүтэ ынах көрдүү барабыт. Ырааппыт буоллахтарына, аҕам, сороҕор убайдарым, сылгылаан аҕалаллар.От ыйыгар дьиэнэн сайылыкпытыгар оттуу барабыт. Убайдарым аҕабын кытта от охсоллор, эдьиийим ийэбин кытта от харбыыллар. Онтон мин дьиэҕэ хаалан торбос аһатабын.
Ыраас уулаах Боруулаахпыт үрэҕэр дуоһуйа сөтүөлүүбүт, дыргыл сыттаах мутукча сытынан ыраас сибиэһэй салгынынан тыынабыт. Онтон атырдьах ыйын бүтүүтэ дьиэбитигэр көһөн кэлэбит.
Сүөһү иитиитэ олус барыыстаах. Сайын ынахтар элбэх үүтү биэрэллэр. Күн ахсын аҕыс уон киилэ үүтү туттарабыт. Быйыл биир киилэ үүппүтүн 60 солкуобайга туттардыбыт. Онтубут күҥҥэ 4800 солкуобай, ыйга 144 тыһ. солкуобай буолар.
Билигин кыһыҥҥы кыстык саҕаланан хотоммутугар тоҕус ынах, биир бургунас, сэттэ тыһаҕас уонна сэттэ торбос баар. Өссө уон биир кууруссалаахпыт, уон сылгылаахпыт. Билигин ынахтарбыт үүттэрэ кыччаата. Маҕаһыынтан атыыласпакка бэйэбит ыабыт үүппүт сибиэһэй аһын, ииппит сүөһүбүт этин сиибит уонна атыылыахпытын да сөп. Тула өттүнэн барыыстаах.
Онон харчыны мээнэ ыспакка, харыстаан туттарга үөрэнэбит. Оҕолоор, билигин ырыынак уонна ыарыы кэмигэр, компьютерга мээнэ олоруохтааҕар, сүөһүнү иитэргэ дьоҥҥутугар көмөлөһүҥ, илии-атах буолуҥ диэн сүбэлиибин.
Виолетта ЮМШАНОВА,
Боруулаах орто оскуолатын 6 кылааһын үөрэнээччитэ.