Тохсунньу 27 күнүгэр Ленинград куорат фашистартан толору босхоломмут күнүн бэлиэтээтибит. Бу күн биһиэхэ, 5-с, 6-с, 7-с кылаас үөрэнээччилэригэр, «Ленинград блокадаттан босхолонуута» диэн кылаас чааһын ыыттылар.
Ленинград блокадата киһи аймах баарын тухары умнуллубат. Быйыл Улуу Кыайыы 80 сылыгар суолтата өссө дириҥиир. Кылаас чааһыгар биһиги бэйэбит саастыы оҕолор ыар дьылҕаларын туһунан киинэни харааста, хомойо, курутуйа көрдүбүт.
Ленинград куораты фашистар 1941 сыл балаҕан ыйын 8 күнүттэн 1944 сыл тохсунньу ый 27 күнүгэр диэри 872 хонук устата төгүрүйэн сыппыттара. Киһи бөҕөтө аччыктаан, хоргуйан өлбүтэ. Ладога күөлүнэн «Дорога жизни» суолунан дьоннор куотан истэхтэринэ, өстөөхтөр элбэх да киһини буомбалаан өлөрбүттэр. Үксэ оҕолор тыыннара быстыбыт. Саныырга олус ыарахан. Киһи оҕолору аһынар.
Ленинград билигин – Санкт-Петербург.
Биһиги, билиҥҥи кэм оҕолоро, урукку сүҥкэн суолталаах кэм историятын интэриэһиргээн, ааҕан, истэн билиэхтээхпит. Ол кэмнээҕи оҕолор, дьоннор тулуурдарын, дьулуурдарын холобур оҥостон, киэн тутта кэпсиир эбээһинэстээхпит.
Айна БАНДЕРОВА, VII кылаас, С.Д. Флегонтов аатынан
Хадаар орто оскуолатын медиа киинин юнкора, Чурапчы