Колосова Лия, Мэҥэ Хаҥалас улууһун Павловскай орто оскуолатын 11 кылааһын үөрэнээччитэ, алын кылаастан саҕалаан туйгуннук үөрэнэр. Улуус, өрөспүүбүлүкэ таһымнаах олимпиадаларга сыл ахсын ситиһиилээхтик кыттар.
— Мин алын кылаастан үөрэхпэр кыһаллан үөрэнэн, туйгун сыаналарынан үөрэнэбин. Иллэҥ кэммэр элбэх туһалаах кинигэлэри ааҕарбын уонна уруһуйдуурбун ордоробун. Быйылгы үөрэх дьылыгар араас бэридимиэт олимпиадаларыгар кытынным. Олортон политехническай хайысхалаах олимпиадаҕа улууспар 1 миэстэни ылан олус үөрдүм. Оскуолабыт өрөспүүбүлүкэ үрдүнэн биллэр бастыҥ черчение учууталын Василий Николаевич Оконешников аатын сүгэр буолан, черчение уруогун дириҥэтэн үөрэтэбит. Политехническай олимпиадаҕа чертеж тутар сорудах баар буолан, черчение уруога туһалаата. Оскуолаҕа үөрэнэрим тухары араас сайыннарар куруһуоктарга, секцияларга дьарыктанным. Холобур: маһынан оһуордаах-бичиктээх оҥоһуктары оҥорор «Арт Ажур» куруһуокка 3 сыл устата олуһун диэн интэриэһиргээн сырыттым. Инники олохпун айар үлэни кытта ситимниир баҕа санаалаахпын.