Биир дойдулаахпыт, Саха сиригэр бастакы Россия Геройа Александр Гаврильевич Колесов балаҕан ыйын 16 күнүгэр оҕо сааһа ааспыт, үөрэммит сиригэр Өймөкөөҥҥө Николай Осипович Кривошапкин аатынан оскуолатыгар сырытта. Бу истиҥ, иһирэх көрсүһүүгэ оскуола оҕолоро, учууталлара, олохтоох дьаһалта кыттыыны ылан, үөрдүлэр-көттүлэр.
Тэрээһини алгысчыт Семен Семенович Сивцев-Өймөкөөн Сэмэнэ алаадьынан, саламаатынан алҕаата. Оскуола Үрүҥ Уоланнара күпсүүр тыаһынан көрүстүлэр, “Оһуокай” ырыатын дьиэрэттилэр. Нарын-намчы кыргыттарбыт саха үҥкүүтүнэн арыаллаатылар. Үөрэппит учууталлара эҕэрдэ бастыҥын эттилэр, кылааһын салайааччыта Ирина Федоровна Сивцева оҕо сааһын кэмнэрин санатан, истиҥ көрсүһүү буолла.
Оскуола дириэктэрэ Екатерина Гаврильевна Посельская Өймөкөөн орто оскуолатын бүтэрбит Айыына Васильевна Винокурова Өймөкөөн биир кэрэ-бэлиэ ытык Кыыллаах хайатын, аатырар сылгыларын уруһуйдаабыт хартыынатын бэлэх уунна.
Олохтоох дьаһалта аатыттан сүрүн исписэлиис Сардана Семеновна Степанова Александр Гаврильевич Колесовка 60 тыһыынча суумалаах сертификаты туттарда. 2023 с. бэс ыйын 16 күнүнээҕи улуус депутаттарын мунньаҕынан бигэргэтиллибит уурааҕы, “Өймөкөөн улууһун Бочуоттаах олохтооҕо” диэн үрдүк ааты иҥэрбиттэрин билиһиннэрдэ.
Бары түмсэн, үөрэн-көтөн, оҕолуун, учууталлыын Россия Геройун кытта хаартыскаҕа түстүлэр. Умнуллубат өйдөбүл буолла.
Наяна Корякина, Н.О. Кривошапкин аатынан Өймөкөөн орто оскуолатын VII кылааһын үөрэнээччитэ.