Олунньу 27-28 күннэригэр Чурапчы улууһун Хадаар нэһилиэгэр «Развитие моей малой Родины» стратегическай дьылабыай оонньууга кыттыыны ыллыбыт. Дьылабыай оонньуу иннинэ тэрилтэлэргэ сылдьаммыт нэһилиэк олоҕун билистибит.
Саха сирин ханнык баҕарар нэһилиэгэр дьону-сэргэни түмэр култуура дьиэтэ буолар. Онтон Хадаарга оннук киининэн «Тускул» КСЦ буолар. Култуура киинигэр биһигини дириэктэр Николай Иннокентьевич Дьячковскай үөрэ-көтө көрүстэ. Николай Иннокентьевич бэйэтин үлэтигэр бэриниилээх, нэһилиэгин сайдыытын туһугар сүүрэр-көтөр, дириҥ билиини уонна уопуту иҥэриммит салайааччы буолара тута көһүннэ. Кини биһигини кытта аһаҕас кэпсэтиини ыытта, интэриэһиргээбит бары боппуруостарбытыгар сиһилии хоруйдаата.
– 2026 сылга Саха Өрөспүүбүлүкэтигэр Култуура сылынан биллэриллибитэ. Онон эппиэтинэспит үрдүк, үлэбит элбэх. Кулун тутар 15 күнүгэр Чурапчы улууһун нэһилиэктэрин икки ардыларынан ыытыллар уус-уран самодеятельность кэнсиэрэ буолаары турар. Бу сылын аайы ыытыллар тэрээһин. Онно күүскэ бэлэмнэнэбит. Биир улахан тэрээһиммит Лукин Василий Васильевич бырайыагынан, ППМИ программанан быйыл Саха сиригэр Хадаар нэһилиэгэр бастакынан араас көрүҥнээх күрэхтэһии ыытыллаары турар. Тырахтарыыстар, ыанньыксыттар күрэхтэһиэхтэрэ, дартс, саахымат, гиирэ аньыыта курдук көрүҥнэр бааллар. Бэйэтин үчүгэйдик көрдөрбүт киһини, Россия чемпионатыгар ыытары былаанныыбыт. 2026 сылга 73 тэрээһини ыытарга былааннаан олоробут, 3160 киһини хабыахтаахпыт. 73 тэрээһинтэн төлөбүрдээх тэрээһиммит – 17, үс тыһыынчаттан тахса киһини хабыахтаахпыт. Бэйэбит киллэрэр сыллааҕы дохуоппут 200-тэн тахса тыһыынча буолар диэн ааҕан олоробут, – диэн кэпсиир дириэктэр.
Быйыл күүскэ эккирэтэһэн, кулуупка экран ылар соруктаахтар. 2026 сылтан Хадаар кулууба «Пушкинскай картаны» киллэрээри олорор. Ааспыт сылга «Пушкинскай картаны» тутар терминал кыайтарбатах эбит буоллаҕына, билигин саҥа ылан, холбонуохтаахтар.
– Быйылгыттан ыла 14-тэн 23-гэр диэри саастаах ыччат дьоммут биһиги тэрээһиммитигэр «Пушкинскай картанан» сылдьар буолуохтара. Бу биллэн туран, үлэбитигэр эппиэтинэспитин улаатыннарар уонна тэрээһиннэрбит таһымнарын өссө үрдэтэри ирдиир, – диэн этэр Николай Иннокентьевич.
Экскурсия кэмигэр Николай Иннокентьевич кулууп кабинеттары, саалаларын көрдөрдө. Манна оҕо аймахтан саҕалаан кырдьаҕастарга тиийэ сынньанар, айар үлэнэн дьарыктанар усулуобуйата баар. Кулууп 20 түмсүүлээх. Олохтоохтор араас куруһуоктарга сылдьаллар, нэһилиэк таһымнаах тэрээһиннэргэ көхтөөхтүк кытталлар. Инникитин өссө элбэх дьону түмэр наадатын туһунан санаатын үллэстэр. Тыыннаах доҕуһуоллаах вокальнай-инструментальнай ансаамбылы нэһилиэк олохтоохторо олус сөбүлүүллэр эбит.
Былааҥҥа саҥа кулууп тутуута турар эбит. Дириэктэр этэринэн, бырайыага бэлэм. Бу тутуу үлэтэ Хадаар нэһилиэгин култуурунай олоҕор саҥа кэрдиис кэми арыйыахтаах. Саҥа дьиэҕэ аныгы технологиялар киириэхтэрэ, сырдык уонна киэҥ саалалар баар буолуохтара.
Биллэн туран, барыта сатаннаҕына, кулууп саҥа дьиэтэ тутулуннаҕына эдэр ыччат бөһүөлэккэ хааларыгар, сайдарыгар улахан тирэх буолара саарбахтаммат.
Күндүүнэ ЕГОРОВА, VIII кылаас,
М.Н. Готовцев аатынан Танда орто оскуолата, Уус Алдан
Валерия Готовцева видеота, ХI кылаас