Олунньу 27-28 күннэригэр буолан ааспыт «Развитие моей малой Родины» (рммр) стратегическай дьылабыай оонньуу чэрчитинэн, Хадаар нэһилиэгэр гааһынан оттуллар котельнай үлэтин билистибит. Манна 9 киһи үлэлиир. Биһигини оператор Афанасий Афанасьевич Мордускин көрүстэ.
Билэрбит курдук, илин эҥэргэ газ турбата Өлүөнэ өрүһү уҥуордаан, 2004 сыллаахха кэлбитэ. Өлүөнэ эбэни туоруур уу аннынааҕы улахан тутуу олоххо киирбитин түмүгэр Кыһыл Сыырга хостонор газ Хадаар нэһилиэгэр 2023 сыллаахха кэлбитэ. Онон газ сүрүн утаҕар нэһилиэк ыала үксэ холбонон олорор. Онтон аныгылыы тутуулаах газ котельнайа улахан саала, оскуола, оҕо саада, кулууп уонна тэрилтэ үлэһиттэрэ олорор уопсай дьиэлэрэ курдук нэһилиэк социальнай суолталаах эбийиэктэрин итиинэн хааччыйар.
– Газ киириэҕиттэн үлэбит быдан уларыйда. Билигин газ кыамтатын, ороскуотун, оннооҕор температуратын көрүү барыта автоматика, барыта компьютер нөҥүө оҥоһуллар. Үс оһохтоохпут. Төһө гааһы ороскуоттаабыппыт барыта счетчикка көстөн турар. Киэһэ, сарсыарда даннайдары түһэрэн ыытан иһэбит. Оператордар кэмиттэн-кэмигэр үөрэх ааһабыт. Газовай котельнай эппиэтинэһэ улахан. Барыта автоматика буолан, биир да сыыһаны-халтыны таһаарыа суохтааххын. Орто сааспыт – 35-36, – диэн кэпсээтэ биһиэхэ А.А. Мордускин.
Снежанна ГОТОВЦЕВА, IX кылаас,
М.Н. Готовцев аатынан Танда орто оскуолата, Уус Алдан