Тохсунньу 14-15 күннэригэр Казахстан Астана куоратыгар 21-с төгүлүн ыытыллар Жаутыковскай олимпада үрдүк таһымнаахтык буолан ааспыта. Саха сириттэн Өрөспүүбүлүкэтээҕи лиссиэй-интэринээт үөрэнээччилэрэ 7 киһилээх хамаанда туруоран, бэрт ситиһиилээхтик кыттан, дойдуларын уонна оскуолаларын чиэһин көмүскээн кэллилэр. Ол курдук, Виктор Малышев боруонса мэтээл хаһаайына буолла.
Бу олимпиада 21 төгүлүн ыытыллар эбит буоллаҕына, РЛИ хамаандата хас сыл аайы кыттар уонна ситиһиилэнэр. Олимпиада 2 күннээх буолар: математикаҕа, физикаҕа уонна информатикаҕа тус-туһунан ыытыллар. Чуолкайдаан биэрэр эбит буоллахха, 3 оҕо — математикаҕа, 2 оҕо — информатикаҕа уонна 2 — физикаҕа.
Быйыл Арассыыйаттан, бүтүн дойду үрдүттэн, 5 эрэ оскуола кыттыыны ылар чиэскэ тигистэ. Бу маннык уларыйыы быйылгыттан киирдэ. Өрөспүүбүлүкэтээҕи лиссиэй үөрэнээччилэрэ ол иһигэр хапсан, бэйэлэрин кыахтарын көрдөрдүлэр, тута сылдьар таһымнарын түһэрбэтилэр.
Ол курдук, олунньу 19 күнүгэр Өрөспүүбүлүкэтээҕи лиссиэйгэ кинилэри чиэстиир үөрүүлээх быһыы-майгы буолан ааста. Оҕолор уонна кинилэр учууталлара, салайааччылара олимпиада хайдах ааспытын, сорудахтар таһымнарын, күөн көрсөөччүлэрин, инники былааннарын туһунан кэпсээтилэр, лиссиэй дириэктэрэ Иван Иванович Шамаев оҕолорго туоһу суруктары туттарда, урукку сылларга илдьэ сылдьыбыт учууталлар олимпиада тэрээһинин ахтан-санаан аастылар.
Быйылгы олимпиадаҕа оҕолору бэлэмнээбит, лиссиэй математикаҕа учуутала, СӨ үтүөлээх учуутала Илья Гаврильевич Кысылбаиков санаатын үллэһиннэ:
Жаутыковскай олимпиада 2004 сылтан ыытыллар, биһиги оҕолорбут билиҥҥэ диэри барытыгар кыттан кэллилэр уонна куруук мэтээллээх төннөллөр. Мин аахпыппынан, аҥардас математикаҕа 2008 сылтан саҕалаан биһиэхэ 8 серебро уонна 12 бронза ааҕыллар. Кистэлэҥ буолбатах, бу олимпиада биһиги ыытар Туймаада олимпиадабыт оҥкулунан оҥоһуллубут. Туймаада олимпиада биһиэхэ 1995 сылтан эмиэ ити предметтэргэ эрэ туһаайыллан ыытыллар. Оҕолорбут бэйэлэрин кыахтарын сөпкө туһанан, дойдуларын уонна оскуолаларын чиэһин көмүскээн кэлэллэрэ, бэйэлэрин тургутан көрөллөрө — бу буоллаҕа биһиэхэ ситиһии!
Оҕолору математика учууталлара Эрчимэн Дмитриевич Избеков уонна Дианна Алексеевна Сивцева салайан, бэлэмнээн илдьэ сырыттылар. Ону таһынан, үөрэнээччилэри кытары тэҥҥэ учууталларга эмиэ олимпиада ыытыллар. Ол түмүгүнэн, Эрчимэн Дмитриевич 1 степеннээх лауреат үрдүк аатын ылла. Эрчимэн Избеков олимпида туһунан маннык эттэ:
Этиллибитин курдук, олимпиадабыт икки күннээх. Биир күҥҥэ 3 садаача бэриллэр, ол 3 садаачаҕа — түөрт чаас. Санаан көрүҥ, хайдах курдук ыарахан сорудахтары биэрэллэрин. Онон, манна дьулуур, тулуур, күүстээх баҕа эрэ киһини хамсатар. Олимпиадаҕа эрдэттэн бэлэмнэнэн, күн аайы оскуолаҕа кэлэн дьарыктанан, элбэҕи ааҕан-суоттаан маннык ситиһиилэргэ тиийэбит буоллаҕа. Оҕолор маладьыастар!
Боруонса мэтээл хаһаайына Виктор Малышев өр бэлэмнэммитин, сыралаах үлэтэ чиэстэммитин, инники олоҕор бу ситиһиитэ киниэхэ олус туһалыырын туһунан, оҕолор бары миэстэлэспиппит буоллар, өссө үчүгэй буолуо этэ диэн кэпсээтэ.
Кырдьык, дьулуурдаах, тулуурдаах, улахан баҕалаах уонна интэриэстээх эрэ киһи үрдүгү ситиһэр кыахтаах. Үөрэнээччилэр олимпиадалара билигин таһымнара олус үрдээн, кытаатан турар кэмэ. Онон хас биирдии олимпиадник оҕо — күүстээх майгылаах киһи. Инникитин да Өрөспүүбүлүкэтээҕи лиссиэй-интэринээт үөрэнээччилэригэр ситиһиилэри баҕарабыт!