Атырдьах ыйын 9 күнүгэр, Чурапчы нэһилиэгэр, Саха сирин үһүс бэрэсидиэнэ, бастакы Ил Дархана, Егор Афанасьевич Борисов 70 сааһын туоларыгар анаан «РФ сенатора Егор Афанасьевич Борисовы кытта биир күн» диэн ааттаах пресс-тур буолла.
Пресс-тур тэрийээччилэринэн СӨ Инновация министиэристибэтэ, «Сахабэчээт» тэрилтэ, Чурапчы улууһун дьаһалтата, «Саҥа олох» хаһыат эрэдээксийэтэ буоллулар.
Бочонина Валентина Ивановна, «Сахабэчээт» генеральнай дириэктэрин сүбэһитэ, пресс-тур салайааччыта:
«Егор Афанасьевич Борисов 70 сааһын көрсө, «Саҥа олох» хаһыат эрэдээктэрэ Людмила Владимировна Попова пресс-тур тэрийиэххэ диэн этии киллэрбитэ. Биһиги ону өйөөммүт этиини Инновация министиэристибэтигэр былааҥҥа киллэттэрбиппит. Пресс-туру Чурапчы нэһилиэгин кытта сөпсөһөн холбоһук бырайыакпыт буолбута. Тэрээһиҥҥэ улуус баһылыга Саргыдаев Степан Анатольевич уонна кини солбуйааччыта Мария Филипповна Кронникова улаханнык көмөлөстүлэр. Пресс-тур бырагыраамматын Людмила Владимировнаны кытта оҥордубут».
Пресс-турга «Саха сирэ», «Кэскил», «НВК», «Ил Түмэн», «Амма олоҕо», «Якутия», «Таатта», «Сахабэчээт» суруналыыстара уонна кэрэспэндьиэннэрэ кыттыыны ыллылар. Тэрийии сүрүн сыалынан бастакы Ил Дархан Егор Афанасьевич Борисовы кытта сэһэргэһэн, киһи быһыытынан арыйыы буолбута.
Суруналыыстары Арчы дьиэтигэр эйэҕэстик алаадьылаах, саламааттаах көрүстүлэр. Алгысчыт Попов Иван Ильич, уоту аһатан, айыыларга сүгүрүйэн алгыстаата.
Пресс-тур бырагыраамматын тутуһан кыттааччылар биир күн иһигэр Егор Борисовы кытта кини төрөөбүт-үөскээбит дьиэтигэр, оҕо сылдьан үөрэммит «Дархан кыһата» оскуолатыгар, эдэр сылдьан үлэлээбит «Сельхозтехникатыгар», кини аатын сүгэр быйыл арыллыбыт библиотека-архивка сырыттылар. Егор Борисов олоҕун суолун туһунан кэпсээтэ. ыйытыыларга хоруйдаата.
Егор Афанасьевич Борисов пресс-турга суруналыыстарга саҥа өттүнэн арылынна. Олоҕун сүрүн бириинсиптэрин, дьиэ кэргэнин үгэстэрин кытта билиһиннэрдэ. Оҕо сааһын көрүдьүөс түгэннэрин кэпсээн дьону үөртэ.
Пресс-туру кытта тэҥҥэ Егор Борисов туһунан документальнай киинэ уһуллуута буолла. Киинэ режиссёрынан «Век якутского кино», «Семен Борисов. Выдающийся сын народа» диэн киинэлэри уһулбут Иван Кривогорницын буолар. Оператордара Давыдов Никита.
Тэрээһин бүтүүтугэр Чурапчы улууһун дьаһалтатын тойонун солбуйааччыта Мария Филипповна Кронникова хас биирдии кэлбит суруналыыска, кэрэспэндьиэҥҥэ махтал сурук уонна Алексей Березовскай, Владимир Федоров суруйбут «Егор Борисов», В.С. Яковлев – Далан үөрэнээччилэрэ уонна Саха сирин суруйааччылара суруйбут «Дьикти саас» көлүөнэттэн көлүөнэҕэ» диэн кинигэлэри туттарда. Биллиилээх дьону өссө ыҥыран, пресс-тур форматын сайыннарыахха диэн санаатын эттэ.
«РФ сенатора Егор Афанасьевич Борисовы кытта биир күн» пресс-тур үрдүк таһымнаахтык ааста. Суруналыыстар бастакы Ил Дархан туһунан саҥа элбэҕи биллилэр. Тэрээһин сыалларын ситистилэр.
Николай АНДРЕЕВ