Көрдөөх-нардаах, сытыы, тобуллаҕас өйдөөх оҕолору түмэр Саха КВН буолар. Оҕо саастарыттан КВН-ынан сөбүлээн дьарыктаммыт ыччаттар Мичил Дегтярев уонна Василий Борисов бэйэлэрин баҕаларынан КВН-ҥа дьоҕурдаах оҕолору түмпүттэрэ номуно иккис сыла буола. Улууспут КВН оонньооччулара бүгүҥҥү күҥҥэ республика бастыҥ хамаандата буолан үгүс ситиһиилэннилэр.
Хамаанда оҕолоруттан аҕыйах ыйытыыга эппиэттииллэригэр көрдөстүбүт:
— Бэйэҕин билиһиннэр. КВН-ҥа хаһааҥҥыттан дьарыктанаҕын?
Адамов Өркөн:
— Мин аатым Адамов Өркөн. Мин бэйэм Чурапчы улууһун Чакыр нэһилиэгиттэн сылдьабын. 5 кылааска Мүрүтээҕи уолаттар гимназияларыгар үөрэнэ кэлбитим. Билигин 11 кылаас үөрэнээччитэбин. Мин «Көрдөөх EAGLES» хамаанда кыттааччытабын. КВН диэни кыра сылдьан интэриэһиргээбэт этим. Былырыын саас хамаандабыт урукку хамандыыра Айхал «Саха КВН» буолар үһү диэн хамаандатыгар ыҥырбыта.
Барабанский Влад:
— Барабанский Влад диэммин, Мүрүтээҕи уолаттар гимназияларын 9 кылааһын үөрэнээччитэбин. Мин «Көрдөөх EAGLES» топёра буолабын. Топёр оруолунан бастакыбын «Саха КВН» 2023 финалыгар кыттыбытым.
Егоров Айхал:
— Мин аатым Егоров Айхал, Мүрүтээҕи уолаттар гимназияларын 10 кылааһын үөрэнэччитэбин. Бэйэм КВНынан дьарыктаммытым номнуо 2 сыл буолла. КВН диэни бэйэм билэн хамаанда туруоран кыттыбыппыт. КВН-ы олус күүскэ таптыыбын, сөбүлүүр дьарыгым буолар.
Захаров Сайаан:
— Мин аатым Захаров Сайаан, Уус-Алдан Бэйдиҥэ орто оскуолатын 9 кылааһын үөрэнэччитэбин. КВНынан дьарыктаммытым номнуо 2 сыл буолла. Миигин КВН-ҥа аан маҥнай Дегтярев Мичил Николаевич үөрэппитэ, такайбыта.
Дьяконов Эрхан:
— Дорҕоонноох дорообо буолуохтун, мин аатым Дьяконов Эрхан Кириллович.
Мин Уус Алдан Лөгөй нэһилиэгиттэн төрүттээхпин. Бороҕоҥҥо 5 кылаастан Мүрүтээҕи “Уолан” гимназияҕа үөрэнэ сылдьабын. Мин «Саха КВН» хамаандатын «Көрдөөх EAGLS» сүрүн оонньооччута буолабын. Салайааччыбыт Василий Васильевич Борисов. Бэйэм КВН диэн тугун интэриэһиргээбэт этим. Онтон 2024 сылга доҕорум Айхал хамаандаҕа ылан олус сөбүлээтим.
Анастатов Дима:
— Мин аатым Анастатов Дима, Мүрүтээҕи уолаттар гимназияларын 11 «А» кылааһын үөрэнэччитэбин. Кыра сылдьан көрү-нары интэриэһиргээн бу көр-күлүү аргыстаах КВН-ҥа киирбитим номнуо 2 сылым буолла. КВН диэни лааҕыртан уонна доҕотторбуттан билбитим. «Көрдөөх EAGLES» уолаттарын аатыттан этиэхпит этэ: «Саха КВН» өрүү баар буол — өрүү баар буол «Саха КВН».
Оҕолор номнуо үгүс ситиһиилээхтэр. Ол курдук, 2023 сыллаахха улууска II миэстэ буолбуттар, 2024 сыллааҕы ыччат Лигатын финал оонньуутун кыайыылаахтара, бу сыл улууска бастакы миэстэ, «Саха КВН» финалыгар бочуоттаах иккис миэстэ буолбуттар.
Бары биир киһи курдук, КВН-ҥа дьарыктанан, сыанаҕа кыбыстыбакка, толлубакка саҥарарга үөрэммиттэрин, үгүс доҕоттордоммуттарын бэлиэтииллэр. Салайааччыларыгар Дегтярев Мичил Николаевичка, Борисов Василий Васильевичка, ону тэҥэ күүс-көмө буолан өйөөбүт Алексеев Анатолий Анатольевичка, Олесов Максим Борисовичка махталларын тиэрдэллэр.
“Өркөн” пресс-киинэ