Тохсунньу 27-29 күннэригэр Сэмэн Данилов аатынан Бэрдьигэстээх орто оскуолатын үрдүкү кылаас үөрэнээччилэрэ 16 буолан Дьокуускайдааҕы коммунальнай-строительнай техникумҥа өрөспүүбүлүкэтээҕи идэҕэ урутаан бэлэмниир Киин көҕүлээһининэн «Маляр» уонна «Слесарь» идэлэригэр үөрэнэн уопут ылан кэллилэр.





Маляр идэтигэр үөрэнэн кэлбит 10-с «А» кылаас үөрэнээччитэ Дайаана Федорова маннык кэпсиир:
— Биһиги Ян Владиславович Степанов уонна Кристина Петровна Полятинская салайааччылаах үс күҥҥэ ДьКСТ-ҥа олус интэриэһинэй идэлэри кытары билсэн кэллибит. Мин тус бэйэм преподавателлэр кэпсииллэрин, ыйытыкка хоруйдуулларын уонна техникум туһунан олус интириэһинэйдик сырдаталларын олус сөбүлээтим. Ол эрэн техникум дьиэтэ эргэ уонна кыараҕас эбит диэн сыаналаатым. Ол да буоллар устудьуоннар ситиһиилэрэ үгүс эбит, олохторугар бэйэлэрин миэстэлэрин булалларыгар, идэ булуналларыгар үөрэх тэрилтэтэ кыһамньылаахтык үлэлэһэр, күүс-өйөбүл буолар эбит. Мин ордук бэйэбит илиибитинэн панно уруһуйдаан, кырааскалаан таһаарбыппытын олус сөбүлээтим. Көрдөххө чэпчэки эрээри, уустук эбит ээ. Оскуолабар маннык үөрэххэ ыыппыттарыгар махтанабын!
Маннык ыытыллар үөрэхтэр, биллэн турар, оҕо инникитин идэ таларыгар олус суолталаах уонна туһалаах буолаллар. Манна даҕатан эттэххэ, оскуолабытыгар педагогическай, медицинскэй уонна АйТи кылаастар бааллар. М.К.Аммосов аатынан Хотугулуу-Илиҥҥи федеральнай университет педагогическай институтун, медицинскэй институт медакадемиятын, Дудкин аатынан Дьокуускайдааҕы сибээс уонна информационнай технология коллеһын, Дьокуускайдааҕы коммунальнай-строительный техникуму кытта сөбүлэҥ түһэрсэн араас үөрэхтэр, консультациялар, көрсүһүүлэр, экскурсиялар ыытыллаллара олус кэрэхсэбиллээх.
Сандаара Егорова, Семен Данилов аатынан Бэрдьигэстээх орто оскуолатын 8 «в» кылаас үөрэнээччитэ, «Сайдам» медиакиин эдкора.
keskil14.ru