Тохсунньу 22 күнүгэр улууспут килбэйэр киинигэр Эбээн-Бытантай национальнай улууһун Саккырыыр бөһүөлэгэр өркөн өйдөөх оҕолорбут дуобакка уонна саахымакка күөн көрүстүлэр.
Кустуур орто оскуолатыттан уопсайа түөрт оҕо кыттыыны ылла. Сарсыарда күн сардаҥатын кытта тэҥҥэ уһуктан, үс чаастан ордук айаннаан, Саккырыыр бөһүөлэгэр айаннатан тиийээт, Саккырыыр орто оскуолатын үөрэнээччилэрин кытта күөн көрсөн оскуолабыт аатын үрдүк чиэстээхтик көмүскээбиттэрин учууталлара, доҕотторо киэн тутта иһиттибит.
Бу тэрээһин өрөспүүбүлүкэтээҕи үөрэнээччилэр икки ардыларынааҕы дуобат күрэҕин сүүмэрдиир түһүмэҕэ буолар. Кыайыылаахтар талыллан олунньу 6 күнүттэн 17-гэр дылы Дьокуускай куоракка «Спортивные якутяне» үөрэнээччилэр спартакиадаларыгар кыттыыны ылыахтара. Ол курдук сүүмэргэ Сардана Слепцова уонна Сарыал Колесов 1 миэстэни ситиһэннэр улууспут чиэһин өрөспүүбүлүкэтээҕи түһүмэххэ көмүскүөхтэрэ. Ону тэҥэ Проня Старостин 2 миэстэ, Света Стручкова 4 миэстэ ылар чиэскэ тигистилэр. Үөрүүлээх сонуну Кустуур орто оскуолатын физкультура учуутала Иннокентий Егорович Колесов иһитиннэрдэ.
Успуорт эти-сиини эрэ буолбакка, өйү эмиэ сайыннарар диэни умнума!
Наум Наумов, Кустуур орто оскуолатын 10 кылааһын үөрэнээччитэ, «Биракчаан» медиакиин.
Эбээн-Бытантай улууһа.
keskil14.ru