Сарсын Билии күнэ. Сарсын оҕолорбут оскуолаҕа үөрэнэ бараллар, онтон ким эрэ аан бастакытын оскуола боруогун атыллыыр. Сарсын оҕоҕо да, төрөппүккэ да, учууталга да олус долгутуулаах күн.
Онтон оскуолаҕа үөрэнээччи уонна төрөппүт туох бырааптаахтарый? Сиһилии ол туһунан бүгүн үөрэх сокуонун сорох быраабын кытары билсиэҕиҥ.
- Оскуоланы талыы бырааба
Оҕо сөбүлээбит оскуолатыгар киириэн сөп. Онно бастайааннай прописка эбэһээт ирдэнэр диэн буолбатах. Ол эрээри оскуола бэйэтин оройуонугар олорор оҕолору аан бастакынан ылар. Ол иһин сөбүлээбит оскуолаҕытыгар миэстэ суох буоллаҕына, ылымыахтарын сөп.
67 Ст. «Об образовании» ФЗ.
2. Үөрэх көрүҥүн талар быраап
Үөрэх көрүҥэ араас буолар:
- оскуола иһигэр — сирэй үөрэнии, кэтэхтэн үөрэнии уонна сирэй/кэтэхтэн аҥаардаан үөрэнии.
- оскуола таһыгар — дьиэттэн олорон үөрэнии эбэтэр экстерн.
17 Ст. «Об образовании» ФЗ.
3. Босхо бэриллиэхтээххэ төлөөбөт бырааптааххыт
- үөрэнэр кинигэлэргэ, пособияларга, УМК, госстандарт иһигэр киирбит үлэ тэтэрээттэригэр.
- үөрэнэр миэбэлгэ (паарталар, остуоллар, олоппостор, таҥас уурар ыскааптар), туттар тэрилгэ (проектардар, компьютердар) уо.д.а.
- харабыллыыр видео систиэмэҕэ, сигнализацияҕа.
- баһаар буолбатын хааччыйар систиэмэҕэ, тэриллэргэ.
- СанПин өрөмүөнүгэр (2.4.2.2821-10).
«Об образовании» ФЗ, ГОСТ 7.60-2003, РФ Минобрнаука 30.03.2016 с. 336 №-дээх бирикээһэ.
4. Баҕа өттүнэн харчынан кыттыспат бырааба
Төрөппүт оскуолаҕа бэйэтин баҕа эрэ өттүнэн көмөлөһүөн сөп. Ол барыта босхо харчынан көмөлөһүү туһунан бигэргэммит сокуоҥҥа сурулла ылдьар.
582 Ст. РФ ГК.
5. Учууталга 3000 солк. иһигэр бэлэх биэрии бырааба
Учууталга 3000 солк. иһигэр төрөппүт, оҕо аатыттан бэлэх биэриэххэ сөп. Мантан үрдүк суумаҕа бэриллибит бэлэх бэрик курдук ааҕыллар.
575 Ст. РФ ГК.
6. Оҕо оскуола иһигэр эчэйии ылбыт буоллаҕына, төрөппүт ону төлөттөрөр бырааптаах
Оҕо оскуола иһигэр сылдьан эчэйии ылбыт буоллаҕына, онно эппиэтинэс бүтүннүү оскуолаҕа сүктэриллэр. Ол иһин хоромньу тахсыбыт буоллаҕына, ону сууд эбэһээт үөрэх тэрилтэтигэр төлөттөрөр.
28 Ст. «Об образовании» ФЗ.
7. Оҕо психолого-медико-педагогическай хамыыһыйаны ааһарыгар, ол түмүгүн быһаарар кэпсэтиигэ төрөппүт кыттыһар уонна бэйэтин санаатын этэр бырааптаах.
44 Ст. «Об образовании» ФЗ.
8. Оскуолаҕа кэтэр форманы ханнык баҕарар сиртэн ылар бырааптааххыт
Оскуола үөрэнээччи кэтэр таҥаһын өҥүн, быһыытын этэр бырааптаах. Ону төрөппүт сөпсөһөр эбээһинэстээх. Онтон оскуола ханнык эмит чопчу биир маҕаһыынтан атыылаһыҥ диэн булгу этэр бырааба суох.
38 Ст. «Об образовании» ФЗ.
Бэйэҕит быраапкытын билэр буолуҥ. Саҥа үөрэх дьыла ситиһиилээх буоллун!
Бэлэмнээтэ Анна СЛЕПЦОВА.