Быйыл оскуола боруогун атыллаабыт бастакы кылаас оҕолоругар «Үөрэнээччи буоллум» диэн сэргэх тэрээһин ыытылынна. Оҕолор оскуола паартатыгар олоруохтарыттан тугу билбиттэрин, туохха үөрэммиттэрин төрөппүттэригэр көрдөрдүлэр. «Учууталбын үөрдээри» ырыаны толордулар, Бүөтүр Тобуруокап «Буукубалар» хоһоонун өйтөн доргуччу ааҕан иһитиннэрдилэр.
Учууталларыттан Зоя Ивановнаттан «Бастыҥ ааҕааччы», «Бастыҥ суоччут», «Бастыҥ буочар» диэн суруктаах мэтээллэри ылан үөрдүлэр-көттүлэр. Остуоруйалары таайан оонньоон да ыллылар. Кырачааннарга букубаардарын бүтэрэн, элбэҕи ааҕар, киэҥ билиилээх дьон буолалларыгар баҕарабыт.
«Эрчим» эдкорпост, Дүллүкү оскуолата, Үөһээ Бүлүү.