Өркөн өй уйата, үөрэх-билии сырдык кыһата Степан Кузьмич Макаров аатынан Чурапчы гимназиятыгар саҥа үөрэх дьыла саҕаланна. Маҥнайгы чуораан чугдаарар күүтүүлээх күнэ бука барыбытын түмтэ.
“Мохсоҕол” байыаннай-спортивнай кулууп иитиллээччилэрэ Арассыыйа, Саха Өрөспүүбүлүкэтин уонна Чурапчы улууһун былаахтарын күөрэччи анньан киллэрэн тэрээһини саҕалаатылар.
Онтон 5-с, 11-с кылаас үөрэнээччилэрэ билиигэ сирдиир, сырдыкка угуйар учууталларын кытта сибэкки тутуурдаах хааман киирдилэр. Быйыл 5-с кылааска барыта 48 оҕо киирдэ. Онтон 11-с кылааска 41 оҕо үөрэниэҕэ.
С.К. Макаров аатынан Чурапчы гимназиятын дириэктэрэ Юрий Михайлович Слепцов, “Чурапчы улууһа” муниципальнай тэриллии баһылыгын бастакы солбуйааччыта Рустам Романович Данилов, Чурапчы улууһун үөрэҕин салалтатын салайааччыта Юрий Павлович Посельскай, Чурапчы улууһун прокурорун солбуйааччыта Андрей Иванович Афанасьев, “Чурапчы нэһилиэгэ” тыа сирин түөлбэтин дьаһалтатын баһылыга Владимир Дмитриевич Сивцев, Чурапчы гимназиятын бастакы дириэктэрэ Альбина Степановна Иустинова, Степан Кузьмич Макаров бииргэ төрөөбүт балта Мария Кузьминична Макарова уонна 11-с кылаас үөрэнээччитэ Айсана Сивцева үөрүүлээх күнүнэн эҕэрдэлээн тыл эттилэр.
Түгэнинэн туһанан, саҥа үөрэх сылын үрдүк ситиһиилээх көрсөр учууталларбытын чиэстээтибит. Ол курдук, нуучча тылын уонна литературатын учуутала Марина Николаевна Керемясова «Саха Өрөспүүбүлүкэтин үтүөлээх учуутала» үрдүк аатынан наҕараадаланна. Саха тылын уонна литературатын учуутала Сардаана Николаевна Гоголева Арассыыйа Бэдэрээссийэтин үөрэхтээһинин министиэристибэтин бириэмийэтин ылар дойдубут бастыҥ учууталларын ахсааныгар киирдэ. Тапталлаах учууталларбытын өссө төгүл истиҥник эҕэрдэлиибит. Эһигинэн киэн туттабыт!
Быйылгы үөрэх дьылыгар оскуоланы бүтэрэр оҕолор 5-с кылаас үөрэнээччилэригэр бэйэлэрэ оҥорбут алгыс тыллаах сөмөлүөттэрин бэлэхтээбиттэрэ ураты түгэн буолла. Онтон гимназия актыбыыстара чаҕылхай үҥкүүнэн бука барыбытын эҕэрдэлээтилэр, сүргэбитин көтөхтүлэр.
Бэлиэ түгэн, үгэс быһыытынан, чуораан тыаһынан түмүктэннэ. Доҕотторбутугар, учууталларбытыгар үүммүт үөрэх дьылыгар ситиһиилэри, саҥа дабайыылары баҕарабыт. Мэлдьи үөрэххэ дьулуурдаах, билиигэ дьаныардаах буола туруохха!
Күннэй СТЕПАНОВА, VII кылаас, Валерия СТЕПАНОВА, IХ кылаас
Анна Лазарева хаартыскалара, X кылаас
Афоня Местников, Саина Захарова видеолара VIII кылаас
Ыытааччы Айыына-Куо Попова, VI кылаас
“Тумус кыһа” медиа-киин, С.К. Макаров аатынан Чурапчы гимназията