Үөрэх инновационнай сайдыытын киинэ 2016 сыллаахтан тэриллэн үлэлиир. Үлэтин сүнньэ оскуолаларга миэстэтигэр идэни үрдэтэр куурустары тэрийиигэ олоҕурар. Тоҕо маннык үлэ хайысхатыгар кэлбиттэрин туһунан дириэктэр Дмитрий Кириллович Титов: «Куоракка бэйэтигэр итинник куурустары тэрийдэххэ, аҕыйах киһи кэлэн истэр, ол иһин уларыйыы тахсыбат. Онтон улууска тахсан, оскуола учууталларын, нэһилиэнньэни кытары көрсөн, баар кыһалҕалары кэпсэтэн, дьону биир санааҕа түмүөххүн сөп. Ол үтүө түмүктээх буолар», — диэн этэр.
Миэстэтигэр ыытыллар сэминээрдэр үтүө түмүктээх буолууларын дьон санаата даҕаны туоһулуур.
Василий Васильевич Тимофеев, Горнай улууһун Күөрэлээх орто оскуолатын дириэктэрэ:
— Дмитрий Кирилловиһы 2019 сыллаахха ыҥыран сэминээр ыыттарбыппыт. Ол саҕана мин саҥа дириэктэрдии киирбитим. Онно кини биһиги оскуолбытыгар кэлэн «Социокультурное проектирование как технология создания будущего населенных пунктов» диэн сэминээри учууталларга, нэһилиэккэ тахсан, тэрилтэ салайааччыларыгар, нэһилиэнньэ актыыбыгар ыыппыта. Дмитрий Кирилловичтыын, мин дириэктэрдиэм инниттэн, оскуолабыт үлэлэһэр.
Манна, миэстэтигэр кэлэн, кини туһалаах сэминээрдэри, учууталларга сүрдээх наадалаах куурустары биэрэр диэн этиэхпин баҕарабын. Кини ыытар куурустарын туһанан, учууталларбыт эбии билиилэрин хаҥаталлар уонна инникитин үлэлэригэр туһаналлар диэн бэлиэтиибин. Учууталлар хайаан даҕаны сылын ахсын идэни үрдэтэр куурустары ааһыахтаахтар, онно Дмирий Кирилловичтыын тэҥҥэ үлэлэһэбит. Быйылгы сылга эмиэ былаанннардаахпыт.
Бэлиэтиэм этэ, кини куурустара үчүгэйэ диэн миэстэтигэр кэлэн, учууталлары кытары атах тэпсэн олорон, бырайыактары көрдөрөн, олус үчүгэйдик сиһилии кэпсиир. Онон Дмитрий Кириллович ыытар куурустарын сүрдээҕин биһириибит уонна быйыл эмиэ кэтэһэ, эрэнэ күүтэбит. Кини оройуоннары, Саха сирин бүттүүнүн кэрийэ сылдьан, учууталларга үөрэх, билии эйгэтин иҥэрэрэ сүрдээх наадалаах уонна туһалаах дии саныыбыт.
Татьяна Климовна Аммосова, Кэбээйи улууһун Левин аатынан Танара орто оскуолатын дириэктэри солбуйааччы:
— Биһиги оскуолабыт Дмитрий Кирилловичтыын, кини С.Н. Донской-II аатынан СӨ Үөрэҕи сайыннарар уонна учууталлар идэлэрин таһымын үрдэтэр институтка үлэлиирин саҕаттан, бииргэ үлэлиир. Ол кэмнэргэ Танара орто оскуолата өрөспүүбүлүкэ агрооскуолаларын ахсааннарын иһигэр киирбитэ. Агрооскуолабыт инновационнай сайдыыга таһымын үрдэтии тыын боппуруоһугар биһиэхэ Дмитрий Кириллович консультацията, ыйан-кэрдэн биэриитэ, учууталлар идэлэрин үрдэтэр куурустарын ыытыыта тирэх буолбута. 2017 сыллаахха А.М. Цирульников ньыматынан нэһилиэкпит социокултуурунай таһымын анаалыһын оҥорбуппут. Ол түмүгэр оскуолабытыгар «Производственный труд учащихся – главная производственная сила аграрного сектора страны» диэн бырайыак оҥоһуллубута. Бу бырайыакпыт 2017 с. Чурапчы улууһун баһылыгын гранын ылан турар. Билиҥҥитэ бырайыакпыт муниципальнай инновационнай былаһаакка статуһун ылан турар уонна билигин даҕаны ситиһиилээхтик үлэлиир. Холобур, быйыл оскуолабыт «Карась кобяйский: от чешуи до косточки» диэн бырайыагынан бу сайын Чурапчыга ыытыллыбыт педагогическай дьаарбаҥкаҕа Үөһээ Бүлүү улууһун үөрэҕин управлениетын начальнигын гранын ылбыта.
Мотрена Николаевна Ефремова, Горнай улууһун В.Д.Лонгинов аатынан Атамай орто оскуолатын директора:
— В.Д. Лонгинов аатынан Атамай орто оскуолата 2012-2013 үөрэх дьылыттан Дмитрий Кириллович Титов научнай салайыытынан «Оҕону сайыннарыыга нэhилиэк кыаҕын туһаныы» диэн тиэмэҕэ республиканскай экспериментальнай площадка статуhун ылан күн бүгүҥҥэ диэри бу тиэмэни сайыннаран үлэлиир. Ол курдук, нэhилиэкпит талааннаах, сатабыллаах дьоно, нэhилиэк общественнай түмсүүлэрэ (соцпартнердар) үөрэнээччилэргэ ханнык эрэ сатабылы иҥэрэр сыаллаах куруhуоктары, дьарыктары ыыталлар. Соцпартнердар куруhуоктара орто сүhүөх кылаас оҕолорун хабаллар.
10 сыл устата уопсайа 23 саталлар үрдүк ситиһиилээхтик улэлээн кэллилэр. Ол курдук, «Тимири уһаарыы» куруһуогун Сидоров С.И., төрөппүт, тарбаҕар талааннаах маастар; «Дуобат» куруhуогун И.Е. Софронеева, Е.Е. Анисимова, төрөппүттэр, «Далбар Хотун» түмсүү чилиэннэрэ; «Хабылык. Хаамыска» — Л.А.Максимова, төрөппүт, инвалидтар түмсүүлэрин салайааччыта; «Ырыа» — М.Д. Яковлева, кулууп директора, «Далбар Хотун» түмсүү чилиэнэ; «Лоскутное шитье» — М.А. Аввакумова, эбээ, «Тирэх» аҕа саастаахтар түмсүүлэрин чилиэнэ, С.Д. Филиппова, эбээ, «Далбар Хотун» түмсүү чилиэнэ; «КВН» — Д.Д. Филиппов, төрөппүт, «АНЫК» ыччат түмсүүтүн лидерэ; «Тустуу» — В.В.Павлов, «АНЫК» ыччат түмсүүтүн чилиэнэ; «Футбол», «Чэпчэки атлетика» дьарыктарын А.А. Ушницкай, «Дьулуур» спортзал инструктора, «АНЫК» ыччат түмсүүтүн чилиэнэ; «Тирэх» аҕа саастаахтар түмсүүлэрин, Олоҥхо сэбиэтин салайааччылара И.И. Жиркова «Айыы оҕолоро» диэн фольклорнай куруhуок; норуот маастара В.Е. Ефремова «Утум» иис куруhуога.
Билигин саталлар аныгы олох хайысхатынан сайдан, үлэлэрэ кэҥээн оҕолорго номнуо урбаан эйгэтигэр билиини, сатабылы иҥэрэр куруһуоктар буоллулар. Саталларга дьарыктанар оҕолор бэйэлэрэ бизнес-бырайыактары суруйан, көмүскээн, ураты оҥоһуктары оҥороллор, атыыга таһаараллар. Үүнэр көлүөнэни иитиигэ, үөрэтиигэ биһиги нэһилиэккэ дириҥ кылааттаах Дмитрий Кирилловичка махталбыт муҥура суох.
Сиһилии Дмитрий Кириллович Титовтыын сэһэргэһиибитин манна көрүҥ:
keskil14.ru