Сыл саамай күүтүүлээх тэрээһининэн Ил Дархан Харыйата буолар. Манна биһиги оскуолабытыттан XI кылаас үөрэнээччитэ Арсен Готовцев кыттар чиэскэ тигистэ.
Кини алын кылаастан саҕалаан үчүгэй үөрэнээччи, оскуолабыт активиһа. Бүтүн Арассыыйатааҕы, өрөспүүбүлүкэтээҕи, улуустааҕы күрэхтэһиилэргэ, олимпиадаларга, конференцияларга ситиһиилээхтик кыттар.
Арсен Бороҕоннооҕу оҕо искусствотын оскуолатын Тандатааҕы филиалын флейта кылааһын выпускнига. Флейтаҕа Аан дойдутааҕы куонкурус лауреата.
Арсен кыра эрдэҕиттэн лидер. Алын кылаастан байыаннай-патриотическай хаамыы командира. Улууска ыытыллыбыт «Снежный Барс» байыаннай-спортивнай оонньууга «Лучший командир» аатын сүкпүтэ.
Арсен спортсмен. Волейболунан дьарыктанар. Өрөспүүбүлүкэтээҕи «Көтөр мээчик» волейбол күрэхтэһиитин призера. Кини өссө даҕаны киһи ааҕан сиппэт элбэх ситиһиилэрдээх.
Биһиги Арсенынан киэн туттабыт. Оскуолатын ситиһиилээхтик түмүктээн, БКЭ-нын ситиһиилээхтик туттаран, баҕарар үөрэҕэр киирдин диэн баҕа санаабытын этэбит! Биһиги Арсеммыт курдук барыга бары дьоҕурдаах оҕолор элбии турдуннар!
Валерия ГОТОВЦЕВА, X кылаас, “Байаҕантай кэскиллэрэ” юнкорпост,
М.Н. Готовцев аатынан Танда орто оскуолата, Уус Алдан