Ахсынньы 19 күнүгэр Саха өроөспүүбүлүкэтин Ил Дархана Айсен Сергеевич Николаев Ил Түмэҥҥэ Анал этиитин оҥордо. Бу туһунан оскуолабыт дириэктэрэ Константин Георгиевич Готовцев санаатын үллэстэригэр көрдөстүбүт.
– Айсен Сергеевич Анал этиитин иһиттибит. Ил Дархаммыт ааһан эрэр сыл ситиһиилэрин, кэлэр 2025 сылга үлэ, сайдыы былааннары чопчу этэн, ыйан биэрдэ. Үөрэхтээһин чааһыгар элбэх саҥа оскуолалар, уһуйааннар үлэҕэ киирэллэрин истэн киһи үөрэр. Оҕону патриотическай өйгө-санааҕа иитии, төрүт тылы харыстааһыҥҥа үлэ күүскэ ыытыллыахтааҕын туһунан эттэ. Илин эҥэр улууска олорор дьон буоларбыт быһыытынан, кэлэр сылтан Өлүөнэ өрүс муостатын тутуута саҕаланарын истэн үөрдүбүт.
Валерия ГОТОВЦЕВА, X кылаас,“Байаҕантай кэскиллэрэ” юнкорпост,
М.Н. Готовцев аатынан Танда орто оскуолата, Уус Алдан