Бу күннэргэ өрөспүүбүлүкэтээҕи лиссиэй-интэринээт үөрэнээччилэригэр идэни талар «Ситиһии үктэлэ-2021» («Лестница к успеху-2021») диэн ааттаах икки күннээх сэминээр саҕаланна. Лиссиэй оҕолорун кытары Владивосток куораттан кэлбит «Роснефть» куратора, тренер Ирина Сергеевна Оглезнева көрүстэ, араас быһыылаах трениннэри, уруоктары ыытан саҕалаата.
«Роснефть» Арассыыйа бөдөҥ хампаанньата каадырдары таларга, үөрэтэргэ улахан үлэни ыытар. Биир оннук бырайыагынан орто оскуолаларга «Роснефть» кылааһын арыйыы буолар уонна бу хайысхаҕа үөрэнэр оҕолор идэни баһылыылларыгар туһуламмыт араас хайысхалаах тэрээһиннэри ыытыы, үөрэтии буолар.
Икки күннээх көрсүһүүлэргэ өрөспүүбүлүкэтээҕи лиссиэй-интэринээт «Роснефть» 10 кылааһын үөрэнээччилэрэ кыттыыны ылаллар.
Сэминээр бырагыраамата хас даҕаны түһүмэхтэн турар, ол курдук оҕолор «Роснефть» хампаанньа туһунан, кини ыччакка ыытар үлэтин кытары билсиэхтэрэ, маны таһынан лицеистэр бэйэлэрин билиһиннэрэн араас хайысхалаах оонньууларга, трениннэргэ, пресс-конференцияҕа кыттыахтара. Тэрээһин түмүгэр үөрэнээччилэр стартап бырайыактары көмүскүөхтэрэ.
Онон «Роснефть» бөдөҥ бырамыысылынас хампаанньата үүнэр көлүөнэ идэ таларыгар ыытар бырайыактара Сахабыт сирин үөрэнээччилэригэр олус туһалаахтар уонна кэскиллээхтэр.
Хаартыскалар көрсүһүү түгэннэриттэн.