Ахсынньы 4 күнүгэр, “Арассыыйа – мин историям” пааркаҕа, Өрөспүүбүлүкэтээҕи кылаас салайааччыларын форумун чэрчитинэн «Дьиэ кэргэн уонна патриотизм: төрөөбүт дойду туохтан саҕаланарый» — диэн ааттаах өрөспүүбүлүкэ бастыҥ кылаас салайааччыларын марафона ыытылынна.
Марафон икки трегынан ыытылынна.
Бастакы трекка Дьиэ кэргэн сылынан сибээстээн оҕону иитиигэ бастыҥ холобурдары көрдүлэр. С.Н.Донской-II аатынан Үөрэҕи сайыннарар уонна идэни үрдэтэр үнүстүүт үлэһиттэрэ экспиэрдээтилэр, кыттааччыларга кэккэ ыйытыктары биэрэн сыаналаатылар. Бу трекка уопсайа 20 кылаас салайааччыта бэйэлэрин уопуттарын кэпсээтилэр, бырайыактарын билсиһиннэрдилэр.
Таатта улууһун М.И. Турнин аатынан Тыараһа орто оскуолатын учуутала, «Өксөкүлээх ыллыга» бырайыак ааптара Екатерина Сергеевна Пудова «Өксөкүлээх үөрэҕин» Дьоһуннааҕы кэпсэтии уруоктарыгар, кылаас чаастарыгар хайдах туттарын туһунан сиһилии кэпсээтэ. Алексей Елисеевич Кулаковскай — Өксөкүлээх Өлөксөй оҕо сааһа Тыараһаҕа ааспыта. Кини олоҕун саамай дьоллоох кэмэ. Улуу киһи үтүө холобуругар аныгы оҕону, ыччаты иитии, киһи киһитэ буола улаатарыгар биир дойдулааҕыттан үөрэнэр, уһуйуллар усулуобуйата үөскүүрүн туһунан кэпсээтэ.
Эдьигээн орто оскуолатын учуутала Ньургустаана Сергеевна Корякина «Кылаас салайааччыта уонна төрөппүт оҕону төрөбүт тылыгар уһуйар ньымалара» диэн бэйэтин педагогическай уопутун туһунан билсиһиннэрдэ. Билиҥҥи оҕо санаатын, толкуйун, сахалыы тылынан сатаан сааһылаан суруйбат, эппэт түгэнэ элбээбитин бэлиэтээтэ. Оскуолаларга оҕону иитии-үөрэтии федеральнай ирдэбилигэр кылаас салайааччылара оҕону төрөөбүт дойдутун таптыыр, убаастыыр гына иитэр үлэтэ олук быһыытынан киирэ сылдьарын эттэ. Граданскай-патриотическай иитиигэ тыл эмиэ сүнкэн оруоллааҕын быһаарда.
Бүлүүтээҕи Г.С. Донской аатынан иккис нүөмэрдээх орто оскуола учуутала Николаева Татьяна Афанасьевна «Уол оҕо — кэскилбит» норуот үтүө үгэстэригэр олоҕуран уол оҕону иитии бырайыаган туһунан кэпсээтэ. Бырайыак сүрүн санаатыгар бастакынан, төрөөбүт тылы таптыыр, убаастыыр үгэстэргэ сүрүн болҕомтону уурбуттар, иккиһинэн, айылҕаҕа харыстабыллаахтык сыһыаннаһыы, үсүһүнэн, норуот үтүө үгэстэринэн иитии. Саха оҕотугар өбүгэ үгэһин, олоҕун-дьаһаҕын, сиэрин-туомун дьарыгын кыра сааһыттан иитии суолталааҕын тиэрдэллэрин, дьиэ кэргэн үгэстэрин улахан суолталаахтарын өйдөтүү. Төрдүһүнэн, үлэҕэ үөрэтии.
Амма улууһун, Амма-Наахара орто оскуолатын учуутала Айталина Артуровна Филиппова «Дьоһуннааҕы кэпсэтии» уруоктарын национальнай компоненынан хайдах ыытарын туһунан сиһилии бэйэтин уопутун кэпсээтэ.
Виктория КОЛОДЕЗНИКОВА
Кeskil14.ru