Сэтинньи 11-13 күннэригэр Иркутскайдааҕы национальнай чинчийэр техническэй университет (ИрНИТУ) быйыл төрдүс сылын ыытар Аан дойдутааҕы «Будущие лидеры Евразии» диэн бэстибээлигэр өрөспүүбүлүкэ лиссиэй-интэринээтиттэн 5 оҕо кыттыыны ылла.
Арассыыйа, Кытай, Вьетнам, Индонезия, Казахстан, Узбекистан дойдуларыттан 200 кэриҥэ үрдүкү сүһүөх үөрэнээччилэрэ туочунай наукаларга, омук тылыгар уонна онлайн куонкурустарга кытыннылар.
Ол курдук, өрөспүүбүлүкэ лиссиэй-интэринээтиттэн Сайаана Бурцева, Влад Егоров,Георгий Осипов (политехническэй кылаастан), Андрей Слепцов, Артем Свинобоев (техническэй хайысхалаах кылаастан) кыттыыны ыллылар.
Күрэхтэһии сүрүн сыала — олимпиада сорудахтарын нөҥүө туочунай науканы төһө билэллэрин быһаарыы уонна техническэй үөрэхтээһини киэҥник тарҕатыы буолар. Кыттааччылар математика, физика, химия, информатика, аангылыйа уонна нуучча тылын биридимиэттэригэр «Moodle» платформанан үлэлээтилэр. Барыта аангылыйа тылынан ыытылынна, ол иһин кыттааччылартан А2-В1 таһымы билэр буолаллара ирдэммитэ.
Кыайыылаахтарга сүрүн бирииһинэн ИРНИТУ-га бу бырагыраамаларынан босхо 12 үөрэх миэстэтэ буолла:
— «Современные технологии электроэнергетики»;
— «Устойчивая инновационная экономика»;
— «Международный бизнес»;
— «Журналистика и коммуникации»;
— «Искусственный интеллект и информатика»;
— «Экология и охрана окружающей среды».
Куонкурус түмүгүнэн Сайаана Бурцева — «Third Place in Chemistry» химияҕа 3 миэстэни, Андрей Слепцов — «Artificial Intelligence and Computer Science» (искусственный интеллект, информатика) уонна «Second Place in Information Technology» информатикаҕа 2 миэстэни ыллылар. Онтон Влад Егоров — «International Business» (международный бизнес) уонна «First Place in Mathematics» математикаҕа муҥутуур кыайыылаах буолла!
Бу үөрүүлээх сонуну РЛИ Инстаграмҥа аккаунугар иһитиннэрдилэр.
Оҕолору үрдүк көрдөрүүлээх ситиһиилэринэн эҕэрдэлиибит! Маладьыастар!