Билиҥҥи бириэмэҕэ киберспорт көрүҥэ аан дойдуну барытын баһылаан турар. Араас платформа (ПК, Xbox One, PS4) нөҥүө оҕотуттан улаханыгар тиийэ араас таһымнаах оонньуулары оонньууллар.
FIFA 20 – оонньууга биллиилээх оонньооччуларынан, хамаандаларынан, бэйэ-бэйэлэринэн оонньуоххун сөп. Сайыҥҥы сынньалаҥ кэмигэр приставкаҕа, көмпүүтэргэ оонньуурга ордук табыгастаах. Онон доҕотторгун кытта «Ливерпуль», «Тоттенхэм», «Манчестер Сити» уонна «Челси» хамаандалары талаҥҥыт оонньооҥ.
Өрөспүүбүлүкэ иһигэр киберспорка FIFA көрүҥэр бастыҥ оонньооччулара оонньуу туһунан санааларын үллэстэллэр.
Егор Веденеев — Juan
FIFA мин сүрүн дьарыгым буолар. Бу оонньууга Саха сирин киберспордун федерацията ыытар күрэхтэригэр кыттан 
харчынан бириэмийэлэнэр чиэскэ тиксээччим. FIFA-ҕа «Ultimate Team» эрэһиим манньыаттарын оонньооччуларга атыылаан дохуот оҥостобун.
2011 сыллаахха джойстигы аан бастаан 8 саастаахпар илиибэр туппутум уонна FIFA 12 оонньоон саҕалаабытым. Франция сүүмэрдэммит хамаандатынан киирсэбин. Дьиҥнээх футболга «Спартак» кулууп бэриниилээх ыалдьааччыта буолабын.
Саха сиригэр киберфутбол сайдыыта сөптөөх хайысханан баран иһэр. Өрөспүүбүлүкэ киберспордун федерацията араас күрэхтэри ыытар. Харантыын иннинэ, хас нэдиэлэ аайы лан-турнирдары (компьютернай кулууптарга) тэрийэллэрэ, оттон пандемия кэмигэр киирсиилэр онлайн ыытылыннылар. Хомойуох иһин, биһиги региоммут оонньуу серверыттан тэйиччи сытар, онон өрөспүүбүлүкэ оонньооччуларын сайдыыларыгар мэһэйдиир.
Ренат Атласов — Renat
Мин футболунан дьарыктанабын. Оскуола саҕаттан куорат уонна өрөспүүбүлүкэ үрдүнэн ыытыллар 
күрэхтэһиилэргэ ситиһиилээхтик кыттабын. Оттон FIFA кыра эрдэхпиттэн сөбүлүүр оонньуум.
2004 сылга убайым FIFA оонньууну миэхэ бэлэхтээбитэ. Оонньоон көрөн баран тута сэргээбитим, сөбүлээбитим. Ол курдук, сарсыардатын футбол көрөбүн, күнүһүн оскуола кэннэ футболга эрчиллэбин, киирсэбин, киэһэлик FIFA оонньуубун. Оҕо сааһым маннык ааспыта. Туох да куһаҕан дьаллыкка ылларбакка, футболу өрө тутабын!
Киберспорка аналлаах араас тэрээһиҥҥэ, Россия чемпионатыгар, кубогын сүүмэрдиир түһүмэҕэр кыайыылардаахпын. Саха сиригэр бу хайысха сайдыа, табыллыа диэн толкуйдуубун. Биһиэхэ олус талаанннаах оҕолордоохпут.
Павел Ильин.