Өрөспүүбүлүкэ күнүн көрсө муус устар 25 күнүгэр СӨ Ил Дархана Айсен Сергеевич Николаев «Саха» НКИХ ханаалыгар быһа эфиргэ таҕыста. Кини олохтоохтор араас эйгэни хабар ыйытыыларыгар хоруйдаата уонна өрөспүүбүлүкэ сайдыытыгар суолталаах тиэмэлэри ырытта.
Эфир кэмигэр Ил Дархан Саха сирин бастакы Президенэ Михаил Ефимович Николаевы ытыктыырын, кини аата үйэтитиллэригэр үгүс үлэ бара турарын эттэ. Ол курдук, Михаил Николаев аатынан проспект арыллан, ол микро-оройуон сайдыытыгар элбэх тутуу ыытыллыахтааҕын эттэ. Былааҥҥа олорор дьиэлэр, социальнай объектар баалларын ыйда. Муус устар 27 күнүгэр Муусука үрдүкү оскуолатын уораҕайын тутууга бастакы сыбаайалар түһэллэрин кэпсээтэ. Ону таһынан, Михаил Ефимович үлэлээбит, улааппыт Эдьигээн улууһун киинигэр кини аатынан биэрэк тутулларын эттэ.
Салгыы Айсен Сергеевич Арассыыйаҕа Дьиэ кэргэн, Саха сиригэр оҕо-аймах сылынан элбэх оҕолоох дьиэ кэргэҥҥэ ураты болҕомто уурулларын кэпсээтэ. Ол курдук, ОДьКХ өҥөтүн төлөбүрүгэр чэпчэтии көрүллэрин, уопсастыбаннай тырааныспарынан сылдьыыга босхо айанныылларын туруорсалларын, орто үөрэххэ туттарсар элбэх оҕолоох ыал оҕотугар үөрэҕин төлөбүрүгэр 50 тыһ. сертификат туттарылларын, оскуолаҕа кинилэр сылаас аһынан хааччыллыахтарын туһунан сиһилии кэпсээтэ. Маны таһынан, «Пушкинскай карта» курдук туттуллар «Карта юного жителя» бырайыак үлэҕэ киирэрин биллибит. Бастакынан бу картаны элбэх оҕолоох ыал ылыахтара диэн эттэ.
Быйыл ыытыллар VIII «Азия оҕолоро» спортивнай оонньуулар үрдүк таһымҥа ыытылларыгар бэлэмнэнии күүскэ бара турарын бэлиэтээн эттэ.
Дойдуга бэриниилээх, билигин Ийэ дойдутун туһугар ыалдьар, сахалыы сиэрдээх-майгылаах оҕолору иитиигэ улахан үлэ барарын ыйда. Ол курдук, дойду Президенэ В.В.Путин «Молодежь России» анал программатын чэрчитинэн, өрөспүүбүлүкэбитигэр хамсааһын бара турарын, «ВОИН» киин үлэтин саҕалаабытын кэпсээтэ. Онно 600-тэн тахса оҕо дьарыктанан саҥа билиини, сатабылы, байыаннай үөрэхтээһин төрүттэрин, билиҥҥи кэмҥэ наадалаах идэлэри баһылаан тахсыахтаахтарын билиһиннэрдэ.
Ил Дархан этиитин өрөспүүбүлүкэбит олохтоохторо болҕомтолоохтук истэн, Саха сирин инники сайдыытыгар элбэх хайысхалаах үлэ тэтимнээхтик бара турарын кэрэхсээбиттэрэ, ылыммыттара буолуо дии саныыбын. Хас биирдии киһи бу бырайыактарга тугунан эмэ кыттыһыа, билиҥҥи балысхан сайдыылаах олоҕу кытта тэҥҥэ хардыылыа.
Алина Санникова,
9 кылаас ,
Эрчим медиа-киин,
Дүллүкү орто оскуолата,
Үөһээ Бүлүү