Кулун тутар 29 күнүгэр Мэҥэ Хаҥалас улууһун Тараҕай нэһилиэгэр оскуола оҕолоругар аналлаах II Өрөспүүбүлүкэтээҕи «Куйуур Фест» күрэх ыытыллынна. Күрэххэ уопсайа 37 уолан өрөспүүбүлүкэ араас муннуктарыттан кэлэн көхтөөх кыттыыны ыллылар.
Күн бастакы аҥарыгар куйуурдааһыҥҥа, бириэмэҕэ ойбону алларыыга бастыҥ ыччаттар күөн көрүстүлэр. Тэрээһини Мэҥэ Хаҥалас улууһун баһылыгын солбуйааччыта, «Төрүт дьарык» федерациятын бэрэссэдээтэлэ Николай Никифоров, Тараҕай нэһилиэгин баһылыга, күрэх сүрүн судьуйата Юрий Порядин, «Дети Манчаары» өрөспүүбүлүкэтээҕи общественнай тэрилтэтэ бэрэссэдээтэлэ Федор Белолюбский үөрүүлээх быһыыга — майгыга астылар, элбэх көлүөнэ ыччаты төрүт дьарыкка угуйан кэлбит, угуйа сылдьар Алексей Бурнашевка, Дмитрий Зыковка, Иван Марковка Саха Өрөспүүбүлүкэтин үөрэҕириитин уонна билимин министиэристибэтин Махтал суруктарын туттарыдылар.
Куйуурга оскуола оҕолоругар 14-гэр диэри 1 миэстэни 5 киилэ 800 грамм балыктаах, Бэдьимэ нэһилиэгиттэн Арчын Захаров, 2 миэстэни 2 киилэ 100 грамм балыктаах Моорук нэһилиэгиттэн Артем Жирков, 3 миэстэни 4 киилэ 500 грамм балыктаах Тараҕай нэһилиэгиттэн Миша Христофоров ылары ситистилэр.
18-гар диэри оскуола оҕолоругар Куйуурдаан балыктааһыҥҥа 13 киилэ 200 грамм балыгы 2 чаас устата хаптаран Мэҥэ Хаҥалас улууһун Моорук нэһилиэгиттэн Кирилл Павлов Саха Сиригэр рекорд олохтоото уонна муҥутуур кыайыылааҕынан ааттанна, 2 миэстэни 7 киилэ 100 грамм балыктаах Тараҕай нэһилиэгиттэн Мирослав Порядин, 3 миэстэни 6 киилэ 600 грамм балыктаах Алтан нэһилиэгиттэн Тимур Сидоров ылары ситистилэр.
Куйуур Фест ордук тыҥааһыннаах көрүҥүнэн бириэмэҕэ Ойбон алларыыта буолла. Оскуола оҕолоругар 18-гар диэри Мэҥэ Хаҥалас улууһун Алтан нэһилиэгиттэн Тимур Сидоров 5 мүнүүтэ 09 сөкүүндэнэн 80 сантиметр халыҥнаах ойбону тэһэн, эргиэнэ 50 см диаметрдаах шаблону батары уган 1 миэстэни ылары ситистэ, Саха сирин рекордун олохтоото уонна оҕолорго Бастыҥ ойбон алларааччытынан ааттанна. 2 миэстэ 5 мүнүүтэ 23 сөкүүндэнэн ойбону тэспит Мэлдьэхси нэһилиэгиттэн Андриан Петров, 3 миэстэ 5 мүнүүтэ 44 сөкүүндэлээх Сокольников Харысхан буоллулар.
Ону таһынан, ордук улахан собону хаппыт Артем Жирков «Күөх боллох бэлэҕэ» уонна аҕыйах дэһээтэйинэн ойбон алларыытыгар 4 миэстэ буолбут Тараҕай нэһилиэгиттэн Максим Владимиров «Кыайыыга дьуллуур» анал аат буоллулар.
Кыайыылаахтар мэдээллэринэн, грамоталарынан, анал бириистэринэн наҕараадаланнылар.
Ыччаттарга олус туһалаах тэрээһининэн Саха өрөспүүбүлүкэтин Куйуур уонна Ойбон алларыытын араас күрэхтэрин хас эмэ төгүлээх кыайыылааҕа Алексей Бурнашев ойбону сөпкө алларыыга маастар-кылааһа буолла, биэрбит сүбэлэрин оҕолор күрэх кэмигэр тута туһаммыттара бэлиэтэммитэ.
Тэрээһин «Дети Манчаары» өрөспүүбүлүкэтээҕи общественнай тэрилтэт уонна Мэҥэ Хаҥалас улууһун Тараҕай нэһилиэгин дьаһалтатын көҕүлээһиннэринэн, Саха Өрөспүүбүлүкэтин үөрэҕириитин уонна билимин министиэристибэтин уонна Мэҥэ Хаҥалас улууһун «Төрүт дьарык» федерациятын өйөбүллэринэн ыытылынна.
Үүнэр көлүөнэ ыччаты саха норуотун төрүт дьарыгын, куйуурдаан балыктааһыны, ойбон алларыытын утумнаахтык баһылыылларыгар иитэр-үөрэтэр эйгэни тэрийии, эти-хааны чэбдигирдии, чөл олоҕу бөҕөргөтүү — күрэх сүрүн сыалларынан буоллулар.
Күрэҕи бэлэмнэспит, тэрийсибит, анал биириистэри туруорбут, тэрээһини үбүлээбит дьоммутугар — сэргэбитигэр барҕа махтал тылларын тиэрдэбит! Бу курдук төрүт дьарыкпытын харыстаан, өрө тутан илдьэ сылдьыаҕын, ыччаттарбытыгар тиэрдэн олоххо бэлэмнээх, дьоһун дьон буолан тахсалларыгар сөптөөх эйгэни тэрийиэҕин, маннык тэрээһиннэри үксэтэ, тэнитэ туруоҕун!
Федор Белолюбский, «Дети Манчаары» өрөспүүбүлүкэтээҕи общественнай тэрилтэ бэрэссэдээтэлэ
Кэскил14.ру