Н.Е. Иванов аатынан Бөтүҥ орто агрооскуолатыгар көмүс күһүнү атааран, атыы-эргиэн дьаарбаҥката үрдүк таһымҥа ааста. Тэрээһин үөрүүлээх чааһын XI кылаас үөрэнээччилэрэ Аэлита Кулаковская уонна Харысхан Филатов иилээн-саҕалаан ыыттылар.
Оскуола үөрэнээччилэрэ уонна төрөппүттэрэ көхтөөхтүк кытыннылар. Буоларын курдук, дьаарбаҥкаҕа оҕуруот аһын кэнсиэрбэтиттэн саҕалаан, минньигэс ас эгэлгэтэ, бурдук аһын арааһа, кус миинигэр тиийэ, илиинэн уран оҥоһуктар, бизнес-инкубатор оҕолорун оҥоһуктара, о.д.а. хамаҕатык атыыланна. Ону тэҥэ хас кылаас аайыттан айылҕа матырыйаалыттан авангард муода, уруһуй, оҥоһук быыстапката уонна ураты оҕуруот аһыгар күрэхтэр буоллулар.
Дьүүллүүр сүбэ тэрээһини үрдүктүк сыаналаата, бары олус бэлэмнээхтэрин бэлиэтээтэ. Оттон нэһилиэкпит олохтоохторо кэлэн сэргэхсийэн, көрөн-истэн, атыылаһан астынан бардылар. Сылын аайы сылдьар, өйүүр дьон эмиэ баар. Кинилэр оҕолорго баҕа санааларын эттилэр, тэҥҥэ үөрүүлэрин үллэһиннилэр.
Ааспыт сайын оскуолабытыгар түөрт хайысхалаах үлэ этэрээттэрэ тэриллэн, үлэлээбит оҕолорго дириэктэрбит Акулина Семеновна Иванова махтал суруктары үөрүүлээх быһыыга туттарда. Сайын устата оҕолор оскуолабыт тэлгэһэтигэр яблоня үнүгэстэрин олортулар, таас кирпииччэлэри тастылар, оҕуруот үлэтигэр көмөлөстүлэр, олоҥхо ыһыаҕар анаан Анисия Даниловна Софронова аатынан сайыҥҥы олоҥхо балаҕана быһыылаах тутуу оҥоһуллуутугар көмөлөстүлэр. Билигин даҕаны этэрээт көхтөөх оҕолоро күһүҥҥү бурдук хомууругар көмөлөһөн үлэлии сылдьаллар.
Тэрээһиҥҥэ киирбит үп сорҕотун биһиги, Бөтүҥнэр биир дойдулаахпытыгар, Амма 2 №-дээх орто оскуолатын VII кылаас үөрэнээччитигэр Люба Никитинаҕа көмө быһыытынан ыытабыт. Өрүү маннык көхтөөх, түмсүүлээх буолуоҕуҥ. Куруутун ситиһии сиэттистин, үөрүү үксээтин!
Сайнаара Сергеева, Юрьяна Гурьева,
VII кылаас үөрэнээччилэрэ, медиакиин кыттыылаахтара.