Мин бүгүн эһигини кытта үөрүүбүн үллэстиэхпин баҕарабын. Ол курдук «Туристический код моей страны, города, поселка, района» про туризм» диэн Аан дойдутааҕы куонкуруска кыттан сүүмэрдиир түһүмэҕин аастым. Уонна кулун тутар 18-20 күннэригэр Москва куоракка салгыы баран кыттар түһүмэҕэр ыҥырылынным. Манна үчүгэйдик кыттыбыт оҕолорго «Артек» Бүтүн Арассыыйатааҕы оҕо сынньанар киинигэр путевка туттараллар. Онон олус эппиэтинэстээх түһүмэххэ үктэнним.
Мин бу куонкуруска Саһыл Сыһыы дойду историятын кытта туох ситимнээҕин туһунан видео ролик оҥорон кэпсээбитим. Бастаан нуучча тылын учуутала Алена Васильевна «куонкуруска кыттыахха» диэн сүбэлээбитэ. Ону мин үөрүүнү кытта сөбүлэспитим. Бастаан ис хоһооно хайдах буолуохтааҕын туһунан толкуйдаабыппыт, сценарий суруйбуппут. Дьэ уонна учууталбын Алена Васильевнаны, нэһилиэгим дьаһалтатын үлэһиттэрин кытта Саһыл Сыһыыны баран устубуппут. Салгыы видеобытын таҥан оҥорор күүстээх үлэҕэ туруммутум.
Учууталым, оскуолам, нэһилиэгим дьаһалтата, «Кэскил» медиа оскуолам миигин өйөөбүттэригэр, сүбэлээн-амалаан, ыйан-кэрдэн биэрбиттэригэр олус үөрдүм. Куонкурска кыттыбыт видеобыт маннык: https://vk.com/wall-199463452_26567
Бу видеобын оҥоро сылдьан аны сахалыы тылынан ыстатыйа суруйбутум. Ол ыстатыйам keskil14.ru саайка тахсыбыта https://keskil14.ru/tumnarbyt-umnarbyt-bukatyn-satammat/
Саһыл Сыһыыга аан бастаан кыра сылдьан театральнай студияҕа дьарыктанар оҕолорбун кытта бара сылдьыбытым. Ол онно бу кыракый алааһы аан бастаан көрбүтүм уонна улахан историялаах алаас буоларын билбитим. Ол кэнниттэн бу бара сырыттым, үгүс үлэ ыытыллыбытын көрдүм.
Мин 7-с кылаастан «Кэскил» медиа оскуолаҕа дьарыктаммытым улаханнык көмөлөстө. Бэйэҥ саныыр санааҕын, толкуйгун видео нөҥүө хайдах тиэрдэргэ, видеону таҥан оҥорууга, сценарий, текст суруйууга, киэҥник хабан көрөргө, сөпкө толкуйдуурга «Кэскил» оҕо бэчээтин кыһатын куратордара үөрэппиттэрэ. 7-с кылаастан семинар, смена бөҕөтүгэр сылдьыбытым, улахан тэрээһиннэри сырдатарга үлэлээбитим, интервью ыла үөрэммитим – бу барыта куонкуруска ситиһиилээхтик кыттарбар улаханнык көмөлөстө.
Онон медиа хайысхатыгар бэйэбин сайыннарбытым туһалаах уонна көмөлөөх буолла.
Гаврил ПРОКОПЬЕВ, IX кылаас,
А.Е. Кралин аатынан Абаҕа орто оскуолата, Амма