Ил Түмэн дьокутааттара саха тылын, литературатын, култууратын учууталларын өрөспүүбүлүкэтээҕи 2-с сийиэһин дэлэгээттэрин кытта көрсүстүлэр.
Көрсүһүүнү Ил Түмэн бэрэссэдээтэлин солбуйааччы Александр Жирков салайан ыытта. Ил Түмэн бэрэссэдээтэлэ Алексей Еремеев түөрт боппуруоска тохтоото. Бастакытынан, Ил Дархан Айсен Сергеевич Николаев тыл сайдыытыгар 100 мөлүйүөн солк. үбү көрбүтүн туһунан иһитиннэрдэ. Иккиһинэн, ФГОС-ка уларыйыылар киирбиттэринэн, нуучча тыла суудаарыстыбаннай тыл буоларынан сайдыахтаах, саха тыла иккис судаарыстыбаннай тыл буолан тэҥҥэ тутуллан үөрэтиллиэхтээх. Үсүһүнэн, 2023 сыл тохсунньу 1 күнүттэн Ил Түмэҥҥэ көрүллэр сокуоннар икки тылынан (нууччалыы, сахалыы) киириэхтээхтэр. Төрдүһүнэн, тыл методикатын үөрэтэр-сайыннарар киин аһыллыахтаах.
Эрдэттэн суруттарбыт учууталлар санааларын этиннилэр. Ол курдук, Хаҥалас улууһун «Туллукчаан» уһуйаан иитээччитэ Екатерина Леонтьева «Эркээйи эргиирэ» бырагырааманы утумнаахтык киллэрэргэ, С.К. Макаров аатынан Чурапчы гимназия учуутала Фёкла Болдовская чаас сарбыллар, олохтоох омуктар тыллара үрдүүрүгэр, үөрэх министиэристибэтигэр төрөөбүт тыл, литература, төрүт култуура учууталларын сүрүннүүр исписийэлиис наадатын ыйда. Дьокуускай куораттааҕы «Айыы кыһата» гимназия учуутала Рустам Каженкин «Эркээйи эргиирэ» хат бэчээттэнэн тарҕатылларын, «Пушкин каартатынан» олохтоох оҕо хаһыатыгар, сурунаалыгар суруттарар кыаҕы биэриэххэ диэн этиннэ. «Сахат» оскуоланы, «Күнтэгил» уһуйааны тэрийээччи Анатолий Бурнашов эһэ, эбэ холобурун хото туһаммакка сылдьарбытын бэлиэтээтэ. Үөһээ Бүлүү улууһун үөрэҕин управлениетын салайааччыта Спиридон Борбуев саха тылын чааһын аҕыйаппат туһугар тохтоото уонна анал сиэксийэҕэ көрөн, бу боппуруоһу быһааралларыгар санаатын этиннэ.
Дьокутааттары кытта көрсүһүү дьоһуннаах буолла, салгыы сийиэскэ санааларын этиниэх буолан тарҕастылар.
Н.Н. Михайлова, «Тымтык» эдкорпост салайааччыта.