Күндү ааҕааччылар, поэзия алыптаах хонуутугар уйдаран ылыаххайыҥ. М.К. Аммосов аатынан ХИФУ ХИНТуоКИ саха салаатын 1 кууруһун устудьуона, актыбыыс, «Сырдык сыдьаайа» эдэр ыччат литературнай түмсүүтүн чилиэнэ Констанция Яковлева кыра сааһыттан хоһоон суруйуунан дьарыктанар. Ырыаҕа ылламмыт, хоһооҥҥо хоһуйуллубут Амма улууһуттан төрүттээх. Өрөспүүбүлүкэтээҕи лицей — интернаты бүтэрбитэ. Ийэтэ Наталья Рязанская — учуутал, суруйааччы. Дьон — сэргэ кинини «Кыларыйбат кырдьык» диэн кэпсээнинэн билэллэрэ буолуо.
Констанция хоһоонноро
***
Таайыллыбат кистэлэҥнэрбин
Соҕотох сулуспар эрэнэбин,
Туох баар сүрэҕим эрэйин
Аргыый киниэхэ кэпсиибин.
Холоруктуу мөкү ааҥнаатын,
Эмискэ былыт буулаатын,
Ыйдаҥаҕа сыыйа талаһабын,
Доҕорбор, сулуска айанныыбын.
***
Санаан көрүҥ: мин көтөргө кубулуйбуппун,
Оччоҕо дьол чыычааҕа — туллукпун,
Көтөн иһэммин кэрэ сири булбуппун,
Онно эйэ, таптал уйатын туппуппун!
Устудьуон буоллум!
Хайдах эрэ итэҕэйбэппин,
Алаһа дьиэбиттэн тэйбиппин,
Бэйэбин устудьуон диирбин
Олуһун долгуйар эбиппин.
Билэбин, сотору саҕаланыахтара:
Эдэр сааhым дьоллоох сыллара,
Олохпор умнуллубат күннэрим,
Хаһан да хатыламмат түгэннэрим.
Сыралаах үөрэҕим дьылыгар
Күүстээх санаам уостубатын,
Устудьуоннуур кэрэ кэмнэрбэр
Эрчимнээх баҕам барамматын!
Мунаахсыйыы
Арыт инникибиттэн айманабын,
Туох буоларын таайа сатыыбын,
Дьылҕам хайдах салалларын
Анааран олус элбэҕи саныыбын.
Арыт идэбиттэн долгуйабын,
Сыыһа талыам диэн куттанабын,
Ыра санаабын билбэт буоламмын
Куруук дьон тылын ылынабын.
Ол эрэн, мин ийэкээм этэринии,
Сүрэҕим сүбэтин өйдөөн истиэм,
Оччоҕо кэлэр суолбар арыллыа,
«Кылап» гынар сөптөөх ылыныы.
Көстүбэт кэрэ
Эйигин аттыбар көрдөхпүнэ,
Сүрэҕим тэбиитэ күүһүрэр,
Эмискэ миэхэ көһүннэххинэ,
Тулам сырылаччы сырдаан кэлэр.
Мин диэки одуулаатаххына,
Бириэмэм субу тохтоон хаалар,
Өрө көтөҕүллүбүт санаабар,
Үөрүүм муҥура суох буолар.
Бэлиэ түүлүм: «батыһыма», — диэн сэмэлиир,
Ол эрэн дууһам эйигин тохтоло суох ирдиир,
Оттон эн сүрэҕин туох диэн эппиэттиир?
Миэним сотору таптал уота умуллуо диир.
Улам кэминэн ыытан кэбиһиэҕим,
Дьылҕам диэбит бигэ эрэлбин,
Кыах баарынан умна сатыаҕым,
Дириҥник тимирэр харахтаргын.
Эльдар Садовников