Мин Лөгөй орто оскуолатын Х кылааһын үчүгэйдик үөрэнэн бүтэрдим. Оскуолаҕа ыытыллар общественнай үлэҕэ көхтөөхтүк кыттабын. Оскуолабыт иһинэн үлэлиир «Кэскил» оҕо түмсүүтэ өрөспүүбүлүкэҕэ Бүтүн Россиятааҕы оҕо хамсааһынын пилотнай площадката буолан, 2016 сылтан ситиһиилээхтик, айымньылаахтык үлэлиир. Бу түмсүү чилиэнинэн үһүс сылбын үлэлиибин. Биһиги араас тэрээһиннэри ыытабыт, элбэх бырайыагы үлэлэтэбит, улууска, өрөспүүбүлүкэҕэ араас куонкурустарга ситиһиилээхтик кыттабыт. Үөрэххэ ситиһиилэрбитин, араас тэрээһиннэрбитин, Өрөспүүбүлүкэбит 100, тапталлаах оскуолабыт 75, Пионерия 100 сылларыгар, улууспутугар ыытыллар VIII спортивнай оонньууларга анаан ыыттыбыт.
Аҕыйах күн аннараа өттүгэр оскуолабытыгар «Юные Якутяне» Киинтэн Россия, Беларуссия оҕолоро кыттыылаах «Поезд Памяти» диэн бырайыак путевкатын биһиги оскуолабытыгар анаабыттарын миэхэ туттарабыт диэн биллэрбиттэригэр, сүрдээҕин үөрдүм. Түгэнинэн туһанан, бары учууталларбар, «Юные якутяне» тирэх Кииҥҥэ барҕа махталбын тиэрдэбин.
«Поезд Памяти» бырайыак туһунан кэпсээтэххэ, аата этэрин курдук, патриотическай хайысхалаах. Бэс ыйын 20 күнүттэн от ыйын 4 күнүгэр диэри Россия, Беларуссия 13 Герой-куораттарынан, историческай сирдэринэн сылдьыахтаахпыт. Айаммыт култуурунай, Россия, Беларуссия тустарынан билиибитин хаҥатар уонна сынньанар киэҥ программалаах. Өрөспүүбүлүкэттэн бу бырайыакка кытта барарым миигин элбэххэ эбээһинэстиир.
Ону тэҥэ мин хомуһунан сөбүлээн дьарыктанабын. Улууска, өрөспүүбүлүкэҕэ үгүс ситиһиилэрдээхпин. Элбэх доҕордоохпун. Саамай үөрэрим диэн, сайыҥҥы сынньалаҥмын туһалаахтык атааран, «Поезд Памяти» бырайыакка кыттан, өссө элбэх доҕоттордонуом дии саныыбын. Түгэнинэн туһанан, учууталларбар, «Юные якутяне» тирэх Кииҥҥэ барҕа махталбын тиэрдэбин.
Уйгулаана ДЕГТЯРЕВА,
Лөгөй орто оскуолатын Х кылааһын үөрэнээччитэ, Уус Алдан.