Мин пионерга 1963 сыллаахха үһүс кылааска үөрэнэ сылдьан киирбитим. Миэхэ пионерга киирбиппинэн космонавт Павел Попович хаартыскалаах открытканы биэрбиттэрэ. Бэhис, алтыс кылаастарга космонавт Андриан Николаев аатынан этэрээт сэбиэтин бэрэссэдээтэлэ этим.
Бэһис кылааһы бүтэрбит сайыммар бөһүөлэккэ пионерскай лааҕыр аһыллан үлэлээбитэ. Лааҕырга Иркутскай куоракка Хо Ши Мин аатынан омук тылын институтугар үөрэнэр устудьуоннар, кэлин учууталлар Аграфена Афанасьевна Левина, Мария Ивановна Кобякова-Каратаева, Варвара Прокопьевна Винокурова-Зверева үлэлээбиттэрэ. Араас интэриэһинэй тэрээһиннэр буолаллара: «Бэлэм буол», «Пионерскай правда» хаһыаттары ааҕыы, сонуннарын атастаһыы, саҥа ырыалары үөрэтии, бохуокка сылдьыы, итии күннэргэ сөтүө, киэһэ уонна сарсыарда лааҕыр былааҕын таһаарыы… Саамай умнуллубат түгэним – пионер кутаата.
Пионер сылларбар араас дойдулар уонна республикалар оҕолорун кытта суругунан доҕордоспутум, кинилэр олохторун, үөрэхтэрин туһунан элбэҕи билбитим. Ол 1967 сыллаахха олунньу 19 күнүгэр «Пионер Точикистон» хаһыат 15 нүөмэригэр аадырыһым тахсыбытыттан саҕаламмыта. Саамай уһуннук Узбекистан, Болгария, Венгрия уонна Украина кыргыттарын кытта суруйсубутум. Суруйсуу билигин санаатахха эппиэтинэстээх буоларга, билиини хаҥатарга, төрөөбүт тыл уонна дойду суолтатын өйдүүргэ көмөлөспүт эбит.
Эппиэттиир буоламмын олус элбэх сурук кэлэр этэ. Биир күн 100 суругу тутан турардаахпын. Кэмбиэр иһигэр открытка, хаартыска, хаhыат, календарь курдук сувенирдар баар буолааччылар.
Доҕотторум кэмбиэрдээх суруктарын, эҕэрдэ открыткаларын уурунууттан саҕалаан арааһы мунньуунан – коллекциялааһынынан олус сөбүлээн дьарыктанабын. Умсугуйар дьарыкпар анаан «Оҕо сааһым ыллыгынан» диэн кинигэни таһаартарбытым.
Устудьуоннуу сылдьан Узбекистан Бухара куоратын таһыгар кишлакка олорор суругунан доҕордоспут кыыспар Хадия Очиловаҕа бара сылдьыбытым, Ташкент, Самарканд, Бухара куораттары көрүүм, билсиһиим олоҕум биир кэрэ, умнуллубат өйдөбүлэ.
Хадия — физика, математика учуутала, улахан дьиэ кэргэн ийэтэ, эбээтэ. Онтон Украина кыыһа Аня Яцкив сыбаайбатыгар ыҥырыыта хойутаан кэлэн, кыайан барбатаҕым.
Идэбин таларбар хаһыатым уонна араас омук оҕолорун кытта суруйсуум көмөлөспүтэ саарбаҕа суох. Нуучча тылын учуутала идэбинэн төрөөбүт дойдубар үлэлиибин.
Онон пионерскай кэмим үтүө өйдөбүллээх.
В.И. Ленин аатынан Бүтүн Сойуустааҕы пионерскай тэрилтэ тэриллибитэ 95 сылыгар аналлаах «Мин пионерскай оҕо сааһым» диэн хаартысканан Арассыыйа таһымнаах куонкуруска кыттан анал дипломунан бэлиэтэммитим.
Валентина ИВАНОВА, Кэбээйи.
Источник: keskil14.ru