Чурапчы улууһугар 2025 сыл олунньу 17 күнүгэр пионерскай тэрилтэ тэриллибитэ 100 сылын туолла. Бу туох тэрилтэний? Мин ийэм оскуолаҕа сылдьан пионерскай оҕо хамсааһыныгар киирбит эбит. Ол саҕана оскуолаҕа үөрэнэр оҕо барыта пионер буолар эбит. “Кыра кылаас оҕолоро кыhыл хаалтыс кэтэн баран улахан курдук сананаллара”, — диэн кэпсиир ийэм. Ким үчүгэйдик үөрэнэр, кылаас, оскуола нэhилиэк общественнай олоҕор көхтөөхтүк кыттар, ол бастакынан пионерга киирэр чиэскэ тиксэр эбит. Пионерга киирбиттэр линейкаҕа торжественнай андаҕар тылларын биэрэллэр, араас сбордар буолаллар эбит. Пионердар баанар кыһыл хаалтыстара үс муннуктаах буолар. Хаалтыс үс муннуга үс көлүөнэ быстыбат сибээhин көрдөрөрө: коммунистар, комсомолецтар уонна пионердар. Ийэм пионердыы сылдьыбыт сылларын олоҕун биир күндү кэмнэринэн ааҕар: “Пионерия диэн мин оҕо сааһым. Пионерга киирэр күнүм — саамай өйдөнөн хаалбыт түгэним. Наһаа долгуйбутум. Биһигини бэрээдэккэ, үлэни, үөрэҕи, дойдуну таптыырга үөрэппитэ. Билиҥҥи кэм үөрэнээччитин сүрүн соруга – дойдутугар патриот буолуохтаах”.
Артем Седалищев
6 “в” кылаас
С.А.Новгородов аатынан Чурапчы орто оскуолата