Чыамайыкы нэһилиэгин библиотекатыгар Петр Тобуруокап 105 сааһыгар аналлаах оскуола оҕолоругар көрдөөх оонньуулар, күрэхтэһиилэр буоллулар. Оҕолор 3 хамаандаҕа арахсан, оонньоотубут. Бастаан нэһилиэк библиотекара Саргылана Петровна Романова Петр Тобуруокап олоҕун, үлэтин туһунан билиһиннэрдэ. Кини кыра эрдэҕиттэн хоһоон, кэпсээн суруйарын, оскуолаҕа сылдьан, Уунаҥныырап диэн псевдонимнааҕын, онтон улаатан баран хос эһээтин араспаанньатынан Тобуруо диэн буолбутун, онтон салгыы Тобуруокап араспаанньаны ылыммытын сэҥээрэ иһиттибит.
Бастакы түһүмэххэ суруйааччы биир хоһоонун талан сыаҥка көрдөрбүппүт. Хамаандаҕа сорудах эрдэ бэриллэн, инсценировка бэлэмнээбиппит.
Иккис түһүмэх викторина этэ. Саргылана Петровна эрдэ кэпсээбититтэн ыйытыыларга хоруйдаабыппыт. Оҕолор П.Тобуруокап туһунан билбит, сэҥээрбит этилэр.
Үһүс түһүмэх суруйааччы хоһоонун талан, иэйиилээхтик ааҕыы этэ.
Бүтэһик түһүмэх П.Тобуруокап «Тоҕо» диэн хоһоонун рэп истиилинэн толоруу.
Кыайыылаах хамаанда (хамандыыр Антон Захаров) грамотанан, минньигэс бэлэҕинэн наҕараадаламмыта.
Нэһилиэк библиотекара Саргылана Петровна оскуола оҕолорун кытары интэриэһинэй тэрээһин толкуйдаан ыыппытыттан олус астынныбыт, элбэҕи биллибит.
Аайа Макарова, Азиза Копырина, IX кылаас, «Проба пера» эдэр кэрэспэндиэннэрэ.
Чыамайыкы, Мэҥэ-Хаҥалас.