Ханнык баҕарар кэмҥэ үлэһит киһини үрдүктүк сыаналыыллар. Мин бүгүн кэпсиир киһим Кэбээйи улууһун Сииттэ нэһилиэгин сорсуннаах булчута Петр Игнатьевич Попов. Кини туһунан сиэн быраатын, оскуолабыт учууталын Роман Игнатьевич Поповтан убайын туһунан кэпсииригэр көрдөстүм.
— Үтүө күнүнэн, Роман Игнатьевич, аҕаҥ бииргэ төрөөбүт быраатын Петр Игнатьевич туһунан кэпсиэҥ дуо?
— Үтүө күнүнэн, Оля. Мин аҕам, чемпион сылгыһыт, кадровай булчут Игнатий Игнатьевич бииргэ төрөөбүт быраата Петр Игнатьевич. Кини улуус, республика хас да төгүллээх чемпиона, социалистическай үлэ кыайыылааҕа, элбэх Бочуотунай грамотанан бэлиэтэммитэ, элбэх булду Ийэ дойдутугар бултаан, дойдубут уйгутун уһансыбыт, элбэх фонда хаһаайына буолбут,элбэх слет, конференция, мунньах кыттыылааҕа буолбута. Кини үлэтигэр олус бэриниилээх, ылыммыт соруктарын куруук эрдэ куоһарар буолан, үгүс куонкуруһу ааһан дойдубут тэбэр сурэҕэр Москваҕа ВДНХ-5а барар чиэскэ тиксибитэ.
— ВДНХ-ҕа кыттыыта киниэхэ тугу биэрбитэ буолуой?
— Сэбиэскэй Сойуус саҕана үлэ кыайыылаахтарын итинник выставкаларга сырытыннараллара. Сэбиэскэй Сойуус 15 республикаттан турара. Олортон саамай бастыҥнары ВДНХ -ҕа ыыталлара. Элбэх көлөһүннэрэ тохтубут, социалистическай үлэ кыайыылаахтара кытталлар этэ. Урукку кэмнээҕи дьон аччыктаан, тоҥон-хатан, хас да сыллааҕы үлэлэрин түмүгэ буоллаҕа. Биһиги убайбыт ВДНХ-ҕа баран кэлбититтэн олус үөрэбит.
— Билигин ВДНХ-ҕа барыы баара үчүгэй буолуо этэ дуу, куһаҕан буолуо этэ дуу?
— Сойуус ыһыллыытыгар ити ыһыллан хаалта. Билигин дойдубут тыа хаһаайыстыбатын үрдүк чыпчаала буоллаҕа. «Регионы России» быыстапка тэриллэн Владимир Путин ыйааҕынан, саҥа тыыннанан, ыытылла турарыттан киһи үөрэр.
— Бүтэһиккэ тугу этиэххитин баҕараҕытый?
— Бутэһиккэ этиэм этэ, бу биһиги нэһилиэкпитигэр колхозка, «Кэбээйи» совхоз отделениетыгар, «Сииттэ» совхоз кэмнэригэр үлэлээбит үтүө дьоммут ааттарын үйэтитэргэ стелла дуу, искибиэр дуу оҥоруохха наада. Колхозтаахтар, тыыл бэтэрээннэрэ, сэрии кэнниттэн үлэлээбит дьоммут ааттара – суоллара сөргүтүллэрэ буоллар диэн баҕа санаалаахпын.
— Роман Игнатьевич, махтанабын!
Оля Винокурова, 8 кылаас, В.Е. Колмогоров аатынан Сииттэ орто оскуолата, Кэбээйи