Ахсынньы 27 күнүгэр Ньурба куорат национальнай многопрофильнай гимназиятыгар Саха автономията тэриллибитэ 100 сылыгар аналлаах «Педагогическай энциклопедия» VI туомун сүрэхтэниитэ буолла.
Тэрээһини үрдүк таһымҥа салайан үөрэх управлениетын үлэһитэ Варвара Прокопьевна Васильева ыытта. Бу үөрүүлээх түгэҥҥэ мин киэн туттар киһибин, эбээбин, Васильева Марфа Степановнаны, РСФСР үөрэҕириитин туйгунун, Учууталлар учууталларын ыҥырдылар. 40 сыл устатыгар үүнэр көлүөнэни иитэр-үөрэтэр үлэҕэ анаабытын, 20 сыл кыра кылаастар учууталларын холбоһугун салайбытын, бэйэтин кэнниттэн элбэх туйах хатарааччыны хаалларбытын чиэстээн бу энциклопедияҕа үлэтин сырдаттылар.
Үүнээри турар 2023 сыл — Учуутал уонна настаабынньык сылынан биллэриллибитэ, бу үөрүүлээх түгэн маны кытта эмиэ ыкса сибээстээх. Энциклопедия кинигэҕэ Ньурба оройуонуттан барыта 21 учуутал киирбит. Кинилэри эҕэрдэлээн, махтанан, энциклопедияны бэлэх уунан ыыттылар.
Кэлэн иһэр Саҥа сылга күндү үөрэххэ уһуйааччыларбытыгар, убаастабыллаах бэтэрээн учууталларбытыгар чэгиэн туругу, этэҥҥэ буолууну баҕарабын!
Эльдар Мордовской, «Ыллык» эдкорпост 8 кылааһын үөрэнээччитэ, Ньурба Хаҥалаһа.