Бүгүн, бэс ыйын 26 күнүгэр, Чурапчы кэрэ мааны сирин Маҕаайы киэҥ туонатыгар «Тыа сирин оскуолата уонна үөрэхтээһин маарката» XIX өрөспүүбүлүкэтээҕи педагогическай дьаарбаҥка өрөгөйдөөх арыллыыта буолла.
Дьаарбаҥка параадыгар Чурапчы улууһун бэтэрээннэрэ, улуустар бэрэстэбиитэллэрэ, тэрийээччилэр уонна Дьокуускай куораттан ыҥырыылаах үөрэх, иитэр эйгэ тэрилтэлэрэ кыттыыны ыллылар.
Тэрээһин сүрүн чааһа Арассыыйа уонна Саха Өрөспүүбүлүкэтин гимнэринэн уонна педагогическай дьаарбаҥка былааҕын көтөҕүүтүнэн саҕаланна. Соһуччу түгэнинэн көрөөччүлэр үрдүлэринэн көтөр аал (дельтаплан) көтөн ааспыта буолла.
Педдьаарбаҥка ыытыллыбыт оройуонугар 1 сылынан олоххо киириэхтээх бырайыактар хаалыахтаахтар. Ол курдук, бастакы күҥҥэ ыытыллыбыт бырайыактар күрэхтэрин кыайыылаахтара грант ыллылар:
1 хайысха — Мугудай нэһилиэгэ, «Өбүгэбит омоон суолунан» бырайыак;
2 хайысха — Дьабыл нэһилиэгэ, «Агроферма «Витамины — круглый год»» бырайыак;
3 хайысха — Болтоҥо нэһилиэгэ, «»ITал» сайыҥҥы лааҕыр» бырайыак;
4 хайысха — Мындаҕаайы нэһилиэгэ, «Эркин» бырайыак;
5 хайысха — Чурапчы нэһилиэгэ, «Сахапедагог.ру» бырайыак;
6 хайысха — Чурапчы нэһилиэгэ, «Фокусный центр реабилитации по для детей с ОВЗ» бырайыак.
Маны таһынан, «Кэскил» оҕо бэчээтин кыһатыттан бырайыактар талыллан 50 тыһыынча сууммалаах сертификатынан наҕараадалааһына буолла. Маннык грант-сертификат «Сахапедагог.ру» диэн бырайыактарын көмүскээбиттэрин иһин Улыбка оҕо уһуйааныгар туттарылынна. «Зеленая ферма» диэн бырайыагы көмүскээбит үс үөрэх тэрилтэтин холбоһук хамаандата наҕараадаланна: Чурапчы агротехнологическай кэллиэһэ, Одьулуун орто оскуолата уонна Одьулуун Күнчээн оҕо уһуйаана. Ону тэҥэ, Чөркөөх орто оскуолатыттан кыттыыны ыла кэлбит «Иллээх эйгэ туруга дьиэ кэргэҥҥэ» бырайыак ааптарыгар, «Воспитание экодуховной личности путем изучения родного края» диэн бырайыактаах Чурапчы улууһун Мындаҕаайы орто оскуолатыгар, «Сахалыы тыыннаах Чурапчы» диэн Семен Новгородов аатынан Чурапчы орто оскуолатын саха тылын учууталларын методическай холбоһугар сертификат туттарылынна.
Ону таһынан, «Кэскил» оҕо бэчээтин кыһатын дириэктэрэ Ольга Ивановна Семенова «Медиа-оскуола бастыҥ салайааччыта» анал бэлиэни чаҕылхай көрдөрүүлээх медиа-оскуолаларын салайааччыларыгар туттарда:
— Громова Надежда Петровна, Хаҥалас улууһун 2-с Малдьаҕар орто оскуолата;
— Лукина Лидия Ивановна, Чурапчы улууһун Хадаар орто оскуолата;
— Поскачина Мария Васильевна, Бүлүү улууһун Тааһаҕар орто оскуолата;
— Павлова Мария Егоровна, Кэбээйи орто оскуолата;
— Петрова Кэскилээнэ Николаевна, Мэҥэ Хаҥалас Ф.Г. Охлопков аатынан Майа орто оскуолата.
Педагогическай дьаарбаҥка үөрүүлээх арыллыыта кэнсиэринэн уонна доҕордоһуу киэһэтинэн түмүктэннэ. Кыттааччыларга үрдүк ситиһиилэри баҕарабыт.
keskil14.ru