Бүгүн, кулун тутар 3 күнүгэр, Былатыан Ойуунускай аатынан Саха драматическай тыйаатарыгар Дьокуускай куорат үөрэҕириитэ терүттэммитэ 100 сылыгар, Надежда Евменьевна Самсонова 125 сааһыгар ананар «Учуутал диэн хайдахтаах үтүө аатый» Хатас оскуолатын кэлэктиибэ туруорбут испэктээкилэ буолан ааста. Испэктээкил Парфений Никитич уонна Надежда Евменьевна Самсоновтар олохторун, айар үлэлэрин, дьиэ кэргэттэрин, Хатас оскуолатын үөрэҕириитигэр кылааттарын туһунан кэпсиир.
Парфений Никитич (1898-1981 сс.) уонна Надежда Евменьевна (1901-1981 сс.) – новатор педагогтар, Саха сирин үөрэҕириитин историятыгар улахан суолу-ииhи хаалларбыт үтүө дьон.
П.Н. Самсонов – РСФСР уонна САССР үтүөлээх учуутала, «Знак почета» уордьан уонна Үлэ Кыһыл Знамятын кавалера. Кини 1955 с. 6 саастарыттан үөһэ саастаах оҕолор үөрэхтээһиннэрин сайдыытын экспериментально быһаарбыта уонна олоххо киллэрбитэ. Саха сиринээҕи национальнай опытнай-көрдерөр оскуолатын төрүттээччилэртэн биирдэстэрэ буолар. 70-тан тахса кинигэ уонна учуобунньук ааптара.
Надежда Евменьевна Самсонова – САССР үтүөлээх учуутала, Ленин уордьанын кавалера, 38 сыл бэриниилээхтик үлэлээбит алын сүһүөх кылааһын учуутала, үөрэх босуобуйаларын уонна методическай ыстатыйаларын ааптара.
Кинилэр Хатас оскуолатын үөрэҕириитэ өрө тахсарыгар, сайдарыгар сүҥкэн кылааты киллэрсибиттэрэ (1948-1873 сс.). Хатас оскуолатыгар нуучча тылын учуобунньуктарын оҥоруунан дьарыктаммытара, Парфений Никитич Хатас оскуолатыгар 8 сыл дириэктэринэн, оттон Надежда Евменьевна алын сүһүөх кылааһын учууталынан бэрт суобастаахтык үлэлээбиттэрэ.
Ону таһынан, кинилэр общественнай үлэҕэ көхтөөхтүк кытталлара. Парфений Никитич оройуоннааҕы уонна сэлиэнньэтээҕи сэбиэттэр депутатынан талыллан, Хатас сайдарын, саҥа оскуола, бибилэтиэкэ, учууталлар уопсайдара, асфальт суол, музыкальнай оскуола тутулларын туһугар күүскэ үлэлээбитэ, турууласпыта.
Испэктээкилгэ Хатас оскуолатын учууталлара, үлэһиттэрэ уонна оскуола оҕолоро оскуолаларын аатын сүгэр киэн туттар дьонун олохторун-дьаһахтарын, айар үлэлэрэ хайдах сайдан испитин, Хатаска көһөн кэлиилэрин бэрт сэргэхтик оонньоон көрдөрдүлэр, көрөөччү биһирэбилин ыллылар.
Парфений Никитич уонна Надежда Евменьевна Самсоновтар курдук үлэлэригэр бэриниилээх чулуу дьону ааттатар, үйэтитэр аналлаах тэрээһиннэр иһин Хатас оскуолатын кэлэктиибигэр махталбытын тиэрдэбит. Маннык курдук туруоруулар, үйэтитэр тэрээһиннэр элбии туралларын баҕарабыт!