Быйылгы XXVII төгүлүн ыытыллыбыт В.П. Ларионов өрөспүүбүлүкэтээҕи научнай-практическай конференцияҕа Күүкэй орто оскуолатыттан 10 кылаас үөрэнээччитэ Гаврил Прокопьев ситиһиилээхтик кыттан кэллэ.
Бу туһунан Гаврил санаатын маннык үллэстэр:
— Мин алын кылаастан араас тиэмэҕэ дакылаат ааҕан кыттар этим, ол эрээри республиканскай таһымнаах конференцияҕа бастакы холонуум буолар. Мин экономическай наука салаатыгар «Личное финансовое планирование выпускников» бырайыагынан кыттыбытым. Үлэм сыала — оскуоланы бүтэрэр үөрэнээччи тус бэйэтин финансовай былаанын оҥостон салайа үөрэнэригэр туһуланар. Үлэбэр социологическай тургутукка 100 киһи хоруйдаата. Сүрүннээн республика 9-11 кылаас үөрэнээччилэрэ, 1 курс устудьуоннара кытыннылар.
Бу тургутук түмүгүнэн, оскуоланы бүтэрэр үөрэнээччи эрдэттэн үп-харчы өттүнэн суоттанан, былааннана үөрэнэрэ туһалаах диэн бырайыакпын суруйан көмүскээтим. Ону таһынан, Дьокуускайга уонна Москваҕа үөрэнэр студент ыйга төһө харчы барарын суоттаабытым. Саамай сүрүн ороскуоттарын көрбүтүм: ХИФУ устудьуона уопсайга олорор буоллаҕына, кыччаабыта 14 000 солкуобай барыыр эбит, онтон квартира куортамныыр буоллаҕына — 40.000 солк. МГУ студена бастакы вариаҥҥа — 10 000 солк., иккискэ — 45.000 солк.
Дакылаатым чэрчитинэн экспертэр элбэх боппуруоһу биэрдилэр, онно толору хоруй биэрдим. Аҥардас кинилэр боппуруостарыттан элбэххэ үөрэнним. Санаабын толору эттим диэн астынным. Салайааччым Ксения Александровна Зорина, нуучча тылын учуутала, үтүө сүбэһитим буолар. Дьаныардаахтык үлэлээбиппит түмүгэр ситиһиилээх буолан, маҥнайгы степеннээх дипломунан наҕараадаланным. Салгыы Н.И. Лобачевскай Бүтүн Россиятааҕы конференцияҕа кыттарга рекомендация ыллыбыт.
Инникитин ситиһиилээхтик кыттарга былаан туруорунан үлэбин чочуйан, тупсаран биэриэм. Бу бырайыакпын салҕыы кылгас видео уруоктаах курс курдук оҥорор былааннаахпыт. Тэрээһин кэмигэр араас улуус оҕолорун кытта билистим. Манна кыттан элбэх саҥа бырайыактары биллим-көрдүм, иһиттим. Ааҕааччыларга чинчийэр үлэнэн дьарыктаныахха диэн баҕа санаабын тириэрдэбин.
Гаврил Прокопьев,
А.К. Акимов аатынан Күүкэй орто
оскуолатын 10 кылааһын үөрэнээччитэ, «Кустук» пресс-киин.