Алексей Елисеевич Кулаковскай-Өксөкүлээх Өлөксөй «Оттоку олук алгыһа» диэн айымньытын туһунан хайдах өйдөөбүппүн кэпсиэм. «Оттоку олук алгыһа» саха ыччатыгар сүбэ быһыытынан суруллубут айымньы буолар. Төһө даҕаны 1912 сыллаахха суруллубут буоллар, билиҥҥи үйэ кэмигэр сөп түбэһэр. Саха норуота хас да үйэ аастар, бу хоһоону сүбэ-ама курдук ылынан, инники кэскилбит үүнэ-сайда турарыгар олус туһалаах буолуо. Ол курдук билиҥҥи ыччат киһи үөрэҕэ уонна өйө-санаата бүтүн Аан дойду таһымыгар эппиэттиир буолуохтаах диэн суруллубут. Ханнык баҕар норуоту кытта саха киһитэ тэбис тэҥҥэ турар киһи буолуохтаах:
«Ньуучча ньургунун кытта
Туруулаһар доҕор буол….»
Ону таһынан, оҕону иитиигэ, төрөөбүт ийэ буорбутун, төрүт сирбитин харыстыахтаахпыт, эстэр – быстар түгэммитигэр күүс – көмө буолуохтаахпыт:
«Бар дьоҥҥор
Баттанар күнүгэр,
Баараҕай баҕана буол,
Суон норуоккар
Солбонуйар күнүгэр,
Суо дурда буол,
Хара норуоккар
Хаалар күнүгэр
Халыҥ халха буол!»
Хоһоон түмүгэр хас биирдии киһи кэлбит аналын толоруохтааҕын туһунан суруйар. Ол аата бэйэтин кэнниттэн кэнчээри ыччаты тэнитэн, үтүө аатын хаалларарга дьулуһуохтаах.
«Үрдүк үтүө аатыҥ
Үйэттэн үйэҕэ диэри,
Үрүҥ күн анныгар
Өһүккэ – омукка
Үргүлльү сүүрэн,
Өс хоһоонугар киириэхтин…»
Өксөкүлээх Өлөксөй айымньылара билиҥҥи кэмҥэ, мин санаабар, ыараханнык суруллубут. Тоҕо диэтэр билиҥҥи эдэр ыччат уус сахалыы санарбаттар, сорох сорохтор сахалыы да аахпаттар. Ол эрэн бу айымньы ис хоһооно олус өйдүнүмтүө буолар. Кини сүбэлэрэ – амалара көлүөнэттэн көлүөнэҕэ бэриллэ туруохтара, саха тыла, саха сирэ уонна саха норуота сүппэтиҥ туһугар, сайда турарыгар олус улахан суолталаах!
Константинова Ева – Мария, 8 Б кылаас
Ой орто оскуолата, Хаҥалас