А.Е. Кулаковскай-Өксөкүлээх Өлөксөй «Оттоку олук алгыһа» мин дууһабар олус дириҥник иҥмит улуу айымньы буолар. Ааҕан баран, киһи киһиэхэ сыһыанын, айылҕаҕа ытыктабылын, омукка тапталын саҥалыы өйдөөтүм.
Өксөкүлээх Өлөксөй — бэйэтин төрөөбүт дойдутун, Саха сирин ытык кэрэтин хас биирдии тылыгар иҥэриммит суруйааччы. Кини Аар айылҕаҕа, үрдүк Айыыларга ытыктабыллаахтык сыһыаннаһан, дьоҥҥо-сэргэҕэ алгыһын анаабыт. Бу алгыс нөҥүө бэйиэт дьону кытта бииргэ, эйэлээхтик, кыыһырсыбакка олоруохтаахпыт, бэйэбит ураты төрүт култуурабытын харыстыахтаахпыт диэн аныгы саха ыччатын ыҥырар. Кини бу тыллары омугун кэлэр кэнэҕэски кэскилин туһугар санаарҕаан, долгуйан этэр.
Билиҥҥи балысханнык сайдар кэмҥэ, кэлии-барыы үксээн турдаҕына, араас култуура дьайыытын түмүгэр, биһиги, саха дьоно, чуолан ыччат өттө, төрөөбүт төрүт тылбытын күннээҕи олоххо туттарбыт аҕыйаатар аҕыйаан, хомолтолоох турукка тиэрдэр. Бу — улахан кутталлаах суол. Ийэ тылбыт сүппэтин, кэлэр көлүөнэҕэ бэриллэрин туһугар хас биирдии оскуолаҕа, оҕо уһуйааныгар саха тылын дириҥэтэн үөрэтии, ааҕыыны, суруйууну киэҥник тэрийии наадалаах дии саныыбын. Төрөөбүт тылбыт уонна төрүт култуурабыт чөл туруктаах буоллаҕына эрэ, омук быһыытынан кэскилбит кэҥиир.
Өксөкүлээх Өлөксөй «Оттоку олук алгыһа» айымньыта ыччаты патриотическай тыыҥҥа иитиигэ, дойдуга тапталы иҥэриигэ, бэйэ төрүт култууратыгар ытыктабылы үөскэтиигэ бастыҥ холобур буолар.
Ол иһин биһиги улуу суруйааччыбыт айбыт, суруйбут хоһооннорун ааҕан, ымпыгар-чымпыгар диэри ырытан, тыыннаах хаалар суолбутун өйдүөх, тобулуох тустаахпыт. «Оттоку олук алгыһа» — А.Е. Кулаковскай-Өксөкүлээх Өлөксөй биһиэхэ анаабыт сүбэтэ-амата, кэриэһэ, дьиҥнээх мындыр санаа мустубут айымньыта.
Аня Ноговицына, 8 «а» кылаас үөрэнээччитэ,
Ф.Г. Охлопков аатынан Майа орто оскуолата,
«Түмэн» медиа киин кэрэспэдьиэнэ.
keskil14.ru