Балаҕан ыйын 27 күнүгэр, Саха Сирин судаарыстыбыннаһын бэлиэтиир күҥҥэ, маҥнайгы төгүлүн ыытыллар аһаҕас өрөспүүбүлүкэтээҕи дьиэ кэргэн уонна дойдуга бэриниилээх буоларга аналлаах «ОТОН.фест» бэстибээл бэйэтин кыайыылаахтарын быһаарда. Бэстибээл Арассыыйаҕа Дьиэ Кэргэн уонна Саха Сиригэр Оҕо Саас сылларыгар ананан, биир ый кэриҥэ, атырдьах ыйын 22 күнүттэн балаҕан ыйын 27 күнүгэр диэри, бүтүн Өрөспүүбүлүкэни хабан, дьиэ кэргэттэри түмэн, араас хабааннаах тэрээһиннэри ыытан, оҕолорго уонна төрөппүттэргэ үтүө өйдөбүл хаалларан ыытылынна.
Бэстибээл биир ый 350-ча кэриҥэ араас тэрээһиннэри уонна күрэхтэри ыытта. Ол курдук, оҕолор төрөппүттэрин кытары мусуойдары, култуура кииннэрин, бибилэтиэкэлэри кэрийэн, уйулҕа үөрэхтээхтэрин, спикердэри, суруйааччылары, өрөспүүбүлүкэ биллэр дьонун кытары көрсүбүттэрэ, элбэххэ үөрэммиттэрэ, дьону-сэргэни кытары билсибиттэрэ. Хас биирдии тэрээһин кэнниттэн ыалдьыттар виртуальнай отон хомуйаллара уонна ол отоннорун мунньаллара. «ОТОН.фест» сүрүн бирииһэ – Текта хампаанньа туруорар 100, 200, 300 тыһ. солкуобайдаах дьиэ кэргэнинэн сынньана барарга сертификаттар. Отонноотоххо оҥоойук туолар дииллэринии, ким элбэх отону хомуйбут, сынньана барар чиэскэ тиксэр.
Бу күн уруһуй, комикс күрэхтэрин кыайыылаахтара билиннилэр, спонсордар, спикердэр, бэстибээлгэ сыһыаннаах дьон-сэргэ муһуннулар, баҕа санааларын эттилэр. Ону тэҥэ, бэстибээл амбассадордара, кырачаан блогер кыргыттар Айыына Кожурова уонна София Прибылых ыалдьыттаатылар.
Ол курдук, бэстибээл түмүгүнэн, кыайыылаахтар ааттаннылар:
127 онлайн-отон хомуйан, тэҥнээхтэрин ырааҕынан хаалларан, Ивановтар дьиэ кэргэн 1 миэстэҕэ таҕыстылар уонна 300 тыһ.солкуобайдаах сертификатынан наҕараадаланнылар. Бэстибээл устата аҕалара Василий, ийэлэрэ Наталья, оҕолоро Эрхан уонна Эния бары бииргэ биир да тэрээһини көтүппэккэ сылдьыбыт, көхтөөхтүк кыттыбыт үлэлэрин түмүгэ буолар. Ийэлэрэ Наталья бэйэтин санаатын үллэстэр:
«Дети Азии» оонньуулар кэннэ оҕолорум чуҥкуйбуттарын өйдөөн көрөн, «Мост» сыһыарыыттан бу «ОТОН.фест» буоларын билбитим. Дьэ, уонна дьиэ кэргэммин муһан, туох баар тэрээһиннэргэ барытыгар сылдьыбыппыт. Бэстибээл ыытар тэрээһиннэрэ барыта босхо уонна, сүрүнэ диэн, оҕоҕо туһалаах, ураты көрсүһүүлэр ыытыллаллара. Кыайыыбытыгар олус диэн үөрдүбүт, билигин даҕаны итэҕэйбэккэ турабыт, мантан киэһэ ханна сынньана барабыт диэн остуол тула кэпсэтиилэр бараллара буолуо. Тэрийээччилэргэ, бары тустаахтарга улахан махталбытын тиэрдэбит, инникитин даҕаны бэстибээл үүнэ-сайда, ыытылла, өссө да элбэх дьиэ кэргэни түмэ турдун диэн баҕа санаабытын этэбит. Дьиҥнээх отоно суох хааллыбыт, ол эрэн виртуальнай отоннору хомуйан, сынньана барар чиэскэ тигистибит!
Оттон 2 миэстэҕэ Мариттар дьиэ кэргэн 75 онлайн-отон хомуйан, 200 тыһ.солкуобайдаах сертификатка тигистилэр уонна 3 миэстэҕэ Александра Михайлова уолунаан Тимур Осиповтыын 49 отон хомуйан, 100 тыһ.солкуобайдаах сертификат хаһаайыннара буоллулар.
Ону таһынан, бэстибээл тэрийээччилэрэ кэлэр 2025 сылга өрөспүүбүлүкэ бары бибилэтиэкэлэригэр төрөөбүт тылы үөрэтэр босхо куурустар арыллалларын туһунан эттилэр.
«ОТОН.фест» инникитин бэйэтин тула элбэх дьиэ кэргэни, оҕолору түмэ, сайыннара турдун. Төрөөбүт тылбыт, култуурабыт инники күөҥҥэ тахсарын, кэлэр кэскил, дьиэ кэргэн сыһыана тупса турарын туһугар ыытыллар тэрээһин көтөр кынат, сүдү күүс, олук буоллун.