Хайахсыт нэһилиэгэр Саха өрөспүүбүлүкэтин Бырабыыталыстыбатын 2024 сыллааҕы үлэтин отчуоттуур мунньаҕа култуура уонна сынньалаҥ киинигэр олунньу 27 күнүгэр буолан ааста.
Мунньаҕы экономика миниистирин солбуйааччыта Иван Елизарович Елисеев салайааччылаах иккис бөлөх Бырабыыталыстыба ааспыт сылга ыытан кэлбит үлэтин туһунан толору кэпсиир видео матырыйаалтан саҕалаата.
Мунньахха барыта 60-тан тахса киһи кыттыыны ылла. Суругунан да, тылынан да элбэх боппуруос киирдэ. Нэһилиэнньэ сүрүннээн хаарбах дьиэ, саҥа уопсай дьиэ, тыа хаһаайыстыбатын, медицина туһунан интэриэһиргээн ыйытта.
Оскуолабыт учуутала Анна Георгиевна Яковлева эргэ уопсай дьиэлэр киһи олороругар сөбө суохтарын туһунан эттэ, саҥа таас уопсай дьиэ тутуутун туруоруста, быраас боппуруоһун быһааралларыгар көрдөстө.
Пенсионер Василий Егорович Федоров нэһилиэктэргэ тыа хаһаайыстыбатыгар ханнык программалар үлэлииллэрин туоһуласта, оттуур ходуһаны өттөөһүҥҥэ көҥүл бэриллэрин дуу, бэриллибэтин дуу туһунан иҥэн-тоҥон ыйыталаста.
Оскуола медигэ Елена Николаевна Борисова туһатыттан тахсыбыт батареялары, уоту харыстыыр алдьаммыт лаампалары ханна туталларын ыйыталаста.
Отчуот түмүгүнэн бөлөх салайааччытын Иван Елизарович Елисеевы көрсөн кэпсэттибит.
– Мин санаабар, мунньах көхтөөхтүк ааста. Атын нэһилиэктэргэ 10-ча боппуруос киирбит эбит буоллаҕына, Хайахсыт нэһилиэгэр 30-тан тахса боппуруос киирдэ. Сүрүн боппуруостарынан хаарбах дьиэттэн көһөрүү, эдэр специалистары дьиэнэн хааччыйыы, балыыһаны, врачебнай амбулаторияны туруорсуу буоллулар. Икки сыл аннараа өттүгэр саҥа таас оскуола-саадка киирбиккит. Ол эрэн эдэр дьон олохсуйуута суох буолан, оҕо ахсаана сылтан сыл аҕыйыыра олохтоохтору долгутарын туһунан эттилэр. Бэриллибит боппуруостары барытын протоколга киллэрдибит. Ол чэрчитинэн, сыл устата туох үлэ ыытыллыбытын эһиилги мунньахха кэлэн отчуоттуохпут. Киирбит боппуруостар болҕомтото суох хаалыахтара суоҕа, – диэн кини санаатын үллэһиннэ.
Отчуоттуур мунньах кэнниттэн үлэлиир бөлөх газ саҥа котельнайын үөрүүлээх арыллыытыгар сырытта. Хаарбах туруктаах уопсай дьиэлэри көрдүлэр-иһиттилэр. Ол кэнниттэн оскуолаҕа, уһуйааҥҥа сылдьан үлэни-хамнаһы билистилэр.
Вилена КИРИЛЛИНА, XI кылаас,
Изольда ХАРЛАМПЬЕВА, Х кылаас,
А.П. Илларионов аатынан Хайахсыт орто оскуолата, Чурапчы