Хаҥалас улууһун М.Е. Васильева аатынан 2 Малдьаҕар орто оскуолата иккис сылын «Кэскил» оҕо издательствотын кытта ыкса ситимнээхтик үлэлиир. Оҕолор медиакииҥҥэ сылдьан, сыл устата keskil14.ru сайтыгар уонна ВКонтакте социальнай ситимигэр, «Кэскил» хаһыатыгар суруйбут сонуннара, интервьюлара, очеркалара тахсаллар. Ый аайы үөрэтэр сыаллаах 5-6 видеоролигы бэлэмниибит. Ол курдук история, география курдук предметтэргэ анаммыт тиэмэлэринэн оҕолор тэттик чинчийии үлэтин ыытаннар, бэйэлэрэ сценарий суруйан, оператор, кэрэспэдьиэн, монтажер быһыытынан үлэлэһэргэ үөрэннилэр.
Ону тэҥэ «Кэскил» оҕо издательствота суруналыыстыка эйгэтигэр интэриэстээх оҕолору түмэн, анал сменалары тэрийэр. Бу лааҕырдарга сылдьан, оҕолор республика араас муннуктарыттан кэлбит талааннаах, айар дьоҕурдаах оҕолору кытта билсэн, тэҥҥэ үлэлэһэн өссө сайдаллар, оскуолаларыгар кэлэн, оҕолору үөрэтэллэр.
II Норуоттар икки ардыларынааҕы интеллектуальнай оонньуулары сырдатыыга биһиги медиакииммититтэн Григорьева Алина үлэлэспитэ. Аны билигин VIII норуоттар икки ардыларынааҕы «Азия оҕолоро» спортивнай оонньууларга биһиги кэрэспэдьиэннэрбит сырдатыы үлэтигэр көмөлөһүөхтэрэ диэн эрэнэбит.
Быйыл «Кэскил» оҕо издательствота республика оскуолаларыгар материальнай базаны хаҥатыыга үп көрбүтэ. Холобура, биһиги медиакииммитигэр 112 440 солкуобайы көрөн, саҥа техника, оборудование атыылаһан, өссө үрдүк хаачыстыбалаах матырыйааллары оҥорорго улахан көмө буолла.
Оҕо төрөөбүт тылынан саҥарар, суруйар, толкуйдуур үөрүйэҕин өйүүр сыаллаах үлэлиир «Кэскил» оҕо издательствотыгар махтанабыт уонна инникитин да бииргэ үлэлэһэргэ бэлэммит.
М.Е. Васильева аатынан
2 Малдьаҕар орто оскуолатын медиакиинэ